«Әзербайжан Хава Йоллары» (AZAL) әуе компаниясының Санкт-Петербург–Баку бағытындағы ұшақ техникалық себепке байланысты кері оралып, Пулково әуежайына қонды, деп хабарлайды Skifnews.kz ақпарат порталы АЗЕРТАДЖ басылымына сілтеме жасап.
Ақпаратты AZAL баспасөз қызметі растады. J2-020 рейсін орындаған Airbus A320 ұшақтың командирі шассидің жұмысындағы ақауға байланысты осындай шешім қабылдаған. Қауіпсіздік шараларына сәйкес, экипаж барлық қажетті әрекеттерді орындап, қонуға дейін жанармайды да азайтты.
Санкт-Петербург әуежайында белгіленген тәртіп бойынша барлық төтенше жағдайлар қызметі дайындық жағдайына келтірілді. Ұшақ Пулково әуежайына Баку уақыты бойынша сағат 04:43-те сәтті қонды. Қону кезінде әуе кемесі ұшу-қону жолағынан кішкене шығып кеткен.
Бортта болған 155 жолаушы эвакуацияланды, зардап шеккендер жоқ.
Санкт-Петербургтен Бакуге жолаушыларды жеткізу үшін AZAL компаниясының басқа ұшағы жіберілді.
«AZAL жолаушыларға сабырлық танытып, жағдайды түсіністікпен қабылдағандары үшін алғыс айтады. Сонымен қатар кәсіби және үйлесімді әрекеттері үшін Пулково әуежайының қызметкерлеріне ризашылығын білдіреді», – делінген хабарламада.
