504 шалғай елді мекенді спутниктік технологиялар арқылы желіге қосу жоспарланған.
Қазақстанда ауылдық елді мекендерді интернетпен қамту қарқынды жүргізіліп жатыр, деп хабарлайды үкіметтің баспасөз қызметі.
Үкіметтің мәліметінше, бүгінде еліміздің 6 179 елді мекенінің 119 қаласы мен 4 906 ауылы байланыспен қамтамасыз етілген. Оның ішінде 2 724 ауылда 3G, ал 2 182 ауылда 4G желісі жұмыс істейді. Сонымен қатар интернетке тіркелген қолжетімділік 1 902 ауылда ADSL арқылы, 2 654 ауылда талшықты-оптикалық байланыс желісі (ТОБЖ) арқылы қамтамасыз етілген.
"2027 жылдың соңына қарай тағы 3 мыңға жуық ауыл жоғары жылдамдықты интернетке қосылады. Бұдан бөлек, 504 шалғай елді мекенді спутниктік технологиялар арқылы желіге қосу жоспарланған. Қазіргі таңда оның 176-сы KazSat арқылы байланысқа қосылған, ал 2025 жылдың соңына дейін тағы 328 ауыл OneWeb жүйесі арқылы интернетке шығу мүмкіндігіне ие болады. 2025 жылғы маусымда Starlink компаниясымен келісімге қол қойылып, 13 тамыздан бастап Қазақстанда ресми түрде қызмет көрсете бастады. Қазіргі таңда Starlink спутниктік интернеті еліміздегі 1,7 мыңнан астам ауылдық мектепте жұмыс істейді", – делінген хабарламада.
Жалпы алғанда, 2025–2027 жылдары аралығында 3 мыңнан астам ауылдық елді мекен жоғары жылдамдықты интернетке қосылады.
Оқи отырыңыз: Полицияның кей функцияларын жеке күзет ұйымдарына беру: Үкіметтің ұстанымы қандай
