Жамбыл аудандық сотында екі ауыл әкіміне қатысты әкімшілік құқық бұзушылық туралы істер қаралды. Лауазымды тұлғалар жақын туыстарына жер пайдалану құқығын берген, деп хабарлайды Жоғарғы соттың баспасөз қызметіне сілтеме жасаған KAZ.NUR.KZ.
Жоғарғы соттың мәліметінше, Жамбыл облысының лауазымды тұлғалары басшыларына жер телімдері берілген азаматтармен туыстық байланыстары бары туралы және мүдделер қақтығысының туындау қаупі туралы хабарламай, жақын туыстарына жер пайдалану құқығын берген.
"2024 жылдың желтоқсанында Полатқосшы ауылдық округі әкімінің жұбайының анасына 1 жыл мерзімге 0,0692 га жер телімін бау-бақша өсіруге берген. Екі айдан кейін жер телімі коммерциялық мақсаттағы санатқа ауыстырылған.
Қаратөбе ауылдық округі әкімінің әпкесі бау-бақша өсіру үшін 0,1 га жер теліміне, сондай-ақ жеке меншікте бұрын жалға алынған 0,0763 га жер теліміне құқық алған. Әкім әйелінің әкесіне 0,3500 гектар жер телімін берген", — делінген соттың баспасөз қызметі таратқан хабарламада.
Жамбыл аудандық сотында мемлекеттік орган басшыларының сыбайлас жемқорлыққа қарсы іс-қимыл шараларын қолданбауына қатысты екі әкімшілік құқық бұзушылық туралы іс қаралған (Әкімшілік құқық бұзушылық туралы кодекстің 680-бабы).
Лауазымды тұлғалар өз кінәларын толық мойындады. Сот оларды кінәлі деп тауып, әрқайсысына 275 мың теңгеден әкімшілік айыппұл салды. Қаулылар заңды күшіне енді.
