Павлодар облысында ауыл әкімі кент тұрғынымен жанжалдасқаны үшін жазаланды. Істі әдеп кеңесі қарады, деп хабарлайды Pavlodarnews.kz.
Басылым тілшісінің мәліметінше, қыркүйектің соңында желіде Екібастұз қаласы Қоянды ауылдық округінің әкімі Ержан Уразалимов пен ветеринарлық қызметтің қызметкері арасындағы жанжал қызу талқыланған. Белгілі болғандай оқиға кешке, жұмыс уақытынан тыс кезде болған.
Басылымның атап өтуінше, бұған дейін ауыл әкімі 12 жыл ветеринария саласында жұмыс істеп, жәбірленушімен достық қарым-қатынаста болған. Полиция қызметкерлерінің сөзінше, қақтығыс тұрмыстық сипатта болды. Қос тарап татуласқанымен, жағдай облыстық әдеп кеңесінде қаралды.
Екі соққы нәтижесінде жәбірленуші жеңіл жарақат алған. Атап айтқанда: миы шайқалып, жабық бас сүйек-ми жарақатын алды.
"Қыркүйектің соңында, сенбіде інімнің үйінде оның қызының туған күніне жиналдық. Сол жерде ветеринарлық қызметтің қызметкері Жақсыбай Жақсылықов та болды. Арамызда жанжал туындап, ол менің жеке өміріме қатысты сөз қозғады. Сол сәтте ашуға беріліп, оны ұрып жібердім. Кейін кешірім сұрадым", - деді Ержан Уразалимов.
Тараптар шағымданбаған және полицияда іс қозғалмаған. Кеңес барысында округ әкімі халықтан да кешірім сұраған.
Екібастұз қаласының әкімі Аян Бейсекин Ержан Уразалимовқа оң мінездеме беріп, қала әкімдігі тарапынан қызметтік тексеріс жүргізілгенін хабарлады.
"Жанжал жұмыс уақытынан тыс уақытта болғанымен, мемлекеттік қызметші мұндай жағдай үшін жауап береді", — деді ол.
Әдеп кеңесі бірауыздан Екібастұз қаласының әкіміне Қоянды ауылдық округінің әкімі Ержан Уразалимовқа "қатаң сөгіс" түріндегі тәртіптік жаза қолдануды ұсынды.
Мәтіннен қате тапсаңыз, бізге жазыңыз
