Елордада қазақ тіліндегі алғашқы мобильді ойын ресми түрде таныстырылды. Мемлекеттік тілді меңгеруге, ақыл-ойды дамытуға арналған түрлі тапсырмадан тұратын, қиындықты еңсеріп, белестерді бағындыруға жетелейтін жобаны Ғылым және жоғары білім министрлігінің «Тіл-қазына» ұлттық орталығы әзірлеген. Тұсаукесерге тіл жанашырлары, Үкімет , Сенат мүшелері, мемлекет және қоғам қайраткерлері, ата-аналар мен балалар қатысты.
Ой мен ойын алаңында сөз алған Сенат депутаттары Нұртөре Жүсіп, Дархан Қыдырәлі мен Халықаралық «Қазақ тілі» қоғамының президенті Рауан Кенжеханұлы жоба авторларын құттықтап, қазақ тіліндегі заманауи контентті дамытудың маңызын және балаларға арналған ұлттық цифрлық өнімдердің стратегиялық мәнге ие екенін атап өтті. Ал Ғылым және жоғары білім министрі Саясат Нұрбек: «Steppe games» – мемлекеттік тіл саясатын ілгерілетудегі және білім беру саласын цифрландырудағы рөлі айрықша, цифрлық экожүйе. Өнім қазақ тілін үйретудің жаңа, креативті және қолжетімді форматын қалыптастыруға ықпал етеді. Оның үстіне креатив индустриядағы мазмұн құнды тауарға айналды. Сондықтан орталықтың бастамасын қолдадық, «Astana Hub» та жобаның жүзеге асуына атсалысты», деп пікір білдірді.
Осыдан соң «Тіл-қазына» орталығының бас директоры Мақпал Жұмабай «Steppe games» ойынының негізгі құрылымын жиналған жұртшылыққа таныстырды. Оның айтуынша, «Steppe games» жобасы мемлекеттік тілді балалар мен жасөспірімдерге ойын арқылы үйретеді. Яғни бұл – «edutainment» форматына негізделген алғашқы қазақ тіліндегі мобильді ойын. «Мұнда ұлттық тағамдар, ұлттық ойындар, тарихи ескерткіштер, салт-дәстүр элементтері тапсырмалар түрінде беріледі. Өнімнің маңызды бір ерекшелігі, қызықты сюжеті бар. Ойынның басты кейіпкерлері Арман мен Айшаның (бала өз атын қойып ойнаса да болады) жетелейтін серігі – тазы. «Steppe games» еліміздің нақты географиялық картасына негізделген. Әр облыс – ойын аймағы, әзірге Алматы мен Астана қалаларынан бастадық. Алдағы уақытта басқа да облыстарды қамтимыз. Сол кезде өңір-өңір болып жарысамыз десек те болады. Ойындағы жалықтырмайтын тілдік жаттығулар мен тапсырмалар балаларды тіл үйренуге үздіксіз ынталандырады», деп түсіндірді М.Жұмабай.
Іс-шара барысында қатысушылар қосымшаны тәжірибе жүзінде сынап көрді. Балаларға арналған арнайы ойын аймағы ұйымдастырылып, әрбір кішкентай қонаққа естелік сыйлықтар табысталды. Айта кетейік, «Steppe games» мобильді қосымшасын «App Store» және «Play Market» платформаларынан жүктей аласыз.
