2025 жылғы 27 мамырда Үкімет отырысында Өнеркәсіп және құрылыс министрі Ерсайын Нағаспақов 2030 жылға дейін Қазақстанда инженерлік желілердің тозу деңгейін 40%-ға дейін төмендету қажет екенін мәлімдеді, деп хабарлайды Zakon.kz тілшісі.
Ол жыл сайын жылыту маусымынан өту кезінде инженерлік желілердің тозуына байланысты жылу, сумен жабдықтау және су бұру жүйелерінде технологиялық бұзылулар мен апаттар туындау қаупі бар екенін атап өтті.
"Өткен жылыту маусымында жылумен жабдықтау жүйелерінде 53, ал сумен жабдықтау және су бұру желілерінде 264 бұзылу тіркелді. Негізінен технологиялық бұзушылықтар Абай облысында, сондай-ақ Ақмола, Шығыс Қазақстан, Қарағанды облыстарында және Астанада байқалды. Ел бойынша жылу, сумен жабдықтау және су бұру желілерінің жалпы ұзындығы шамамен 137 мың шақырымды құрайды. Орташа тозу деңгейі – 49%, ал шамамен 67 мың шақырым желі ауыстыруды қажет етеді", – деді Нағаспақов.
Оның айтуынша, ең тозған инженерлік желілер Павлодар, Қарағанды, Абай, Шығыс Қазақстан, Солтүстік Қазақстан және Ұлытау облыстарында орналасқан.
"Биыл республикалық бюджеттен сумен жабдықтау нысандарын салу және қайта жаңарту үшін 176 млрд теңге көзделген. Мемлекет басшысының сайлауалды бағдарламасын іске асыру жөніндегі іс-қимыл жоспарына сәйкес, 2030 жылға қарай инженерлік желілердің тозуын 40%-ға дейін төмендету қажет. "Энергетикалық және коммуналдық секторды жаңғырту" атты Ұлттық жоба қабылданды", – деді Ерсайын Нағаспақов.
Министрдің айтуынша, бұл жоба аясында сумен жабдықтау және су бұрудың шамамен 8 мың шақырым желісін жаңғырту жоспарланған, жалпы құны – 1 трлн теңге.
"Жобаны іске асыру инженерлік желілердің тозу деңгейін кезең-кезеңімен төмендетуге, сумен жабдықтау және су бұру жүйелерінің сенімді әрі үздіксіз жұмысын қамтамасыз етуге, көрсетілетін қызметтердің сапасын арттыруға және тұрғын үй-коммуналдық шаруашылық саласындағы апаттардың санын азайтуға мүмкіндік береді", – деп толықтырды министр.
Бұған дейін Қазақстанда жаңа кәсіби мерекелер пайда болғандығы хабарланған болатын.
