"Титаник" сынықтарына бағыт алған "Титан" батискафының апатына инженерлік қателіктер себеп болған .
Бұл туралы АҚШ Көліктегі қауіпсіздік жөніндегі ұлттық кеңесінің (NTSB) есебіне сілтеме жасап, CNN хабарлады, деп жазады inbusiness.kz сайты.
Есепке сәйкес, батискафты жобалау кезінде кеткен инженерлік кемшіліктер оның конструкциясында көптеген ақаулардың пайда болуына әкелген. Атап айтқанда, көміртек талшығынан жасалған герметикалық камера беріктік пен сенімділік талаптарына сай болмаған.
Сондай-ақ, "Титан" батискафының иесі OceanGate компаниясы құрылғыны қажетті сынақтардан өткізбеген және оның нақты беріктігі туралы сенімді деректер болмаған.
Баяндамада, егер компания төтенше жағдайларға арналған хаттамаларды толық орындаған жағдайда, батискафты ертерек табуға болатыны айтылған. Бұл экипажды құтқаруға мүмкіндік бермесе де, іздестіру уақытын және ресурстарды үнемдеуге сеп болар еді.
NTSB тұжырымдары АҚШ Жағалау күзетінің бұған дейін жариялаған баяндамасымен үндес. Онда да Titan имплозиясын алдын алуға болатыны және OceanGate компаниясының қауіпсіздік шараларындағы сәйкессіздіктер сынға алынған.
Еске салайық, 2023 жылдың маусымында Солтүстік Атлантикада "Титаник" қалдықтарын зерттеуге аттанған "Титан" батискафы жоғалып, кейін оның жарылғаны (имплозия) анықталды. Бортта Франция, АҚШ, Ұлыбритания және Пәкістан азаматтары болған бес адам қаза тапты.
