Бұл ел мұнай мен газдың ірі импорттаушысы болып қалып отыр.
Үндістан АҚШ президенті Дональд Трамптың мәлімдемесіне жауап берді, деп хабарлайды inbusiness.kz сайты DW агенттігіне сілтеме жасап.
Бұған дейін АҚШ президенті Дональд Трамп Үндістан Ресей мұнайын сатып алуды тоқтататынын айтқан болатын. Оның айтуынша, премьер-министрі Нарендра Моди оған осындай уәде берген.
"Үндістан – мұнай мен газдың ірі импорттаушысы. Энергетикалық тұрақсыз жағдай кезінде үнді тұтынушыларының мүдделерін қорғауға басымдық береміз. Мұнай импортына қатысты саясатымыз осы мақсатқа бағытталған", – деді Үндістан Сыртқы істер министрлігінің өкілі Рандхир Джайсвал.
Джайсвалдың сөзінше, энерготасымалдаушылар бағасының тұрақтылығын қамтамасыз ету үшін Үндістан нарықтық жағдайларға сай энергия көздерін кеңейтеді. Ол Үндістан мен АҚШ арасында энергия саласындағы ынтымақтастық жалғасып жатқанын айтты.
Айта кету керек, тамыз айының соңында АҚШ Үндістанға қатысты маңызды шешім қабылдағанын жазғанбыз. Үндістан АҚШ-тың қысымынан соң Ресей мұнайын сатып алуды азайтатыны туралы ақпарат тарады.
