Қазақстандағы кәсіподақ қозғалысына биыл 120 жыл толып отыр. Бұл — ел тарихындағы елеулі кезең ғана емес, сонымен қатар еңбек адамдарының құқықтарын қорғау жолындағы ынтымақ пен бірліктің, ортақ мақсат пен жұмылған табанды еңбектің ғасырлық шежіресі.
Кәсіподақ қозғалысының бастауы 1905 жылдан басталады. Ол кезеңде қазақ даласында алғаш жұмысшылар ұйымдары құрыла бастады. Бастапқыда бұл ұйымдар шағын шеңберде әрекет еткенімен, уақыт өте келе еңбек қатынастары жүйесінің қалыптасуына, жұмысшы құқығын қорғау ісінің орнығуына айтарлықтай үлес қосты. Қоғам өзгерді, саяси дәуірлер алмасып отырды, бірақ кәсіподақ қозғалысының өзегі — еңбек адамына адал қызмет ету, оның мүддесін қорғау жолындағы міндет — еш өзгерген жоқ.
Тарихқа көз жүгіртсек, кәсіподақтар тек жалақы мәселесімен немесе еңбек жағдайын жақсартумен ғана айналыспаған. Олар ұлт бірлігін нығайтуға, ел ішіндегі әлеуметтік тұрақтылықты сақтауға, әділдік пен заң үстемдігін қамтамасыз етуге де белсене атсалысты. Кеңестік кезеңде де, Тәуелсіздік алғаннан кейінгі жаңа жағдайда да кәсіподақ ұйымдары қоғамдағы өз орнын жоғалтпай, қайта жаңа серпінмен дамуға бет бұрды. Қиын-қыстау сәттерде де кәсіподақ өз миссиясынан таймай, еңбек адамының үніне айнала білді. Бүгінгі таңда Қазақстан кәсіподақтары — миллиондаған адамның сенімді тірегі, әлеуметтік әділеттілік жолындағы маңызды қоғамдық күш. Кәсіподақтар жұмысшы мен жұмыс беруші арасындағы диалогтың басты тетігіне айналып, еңбек қауіпсіздігін қамтамасыз ету, лайықты жалақы, әлеуметтік кепілдіктер, еңбек жағдайын жақсарту бағытында нақты нәтижелерге қол жеткізіп келеді. Бұл тек ресми есеп емес, бұл — күнделікті атқарылып жатқан жүйелі жұмыс.
Қазіргідей өзгерістер кезеңінде кәсіподақ қозғалысының рөлі бұрынғыдан да артып отыр. Жаһандану, технологиялық прогресс, еңбек нарығындағы жаңа талаптар мен тәуекелдер кәсіподақтардың алдында жаңа міндеттер қойып отыр. Біз бүгін тек қорғаушы ұйым ғана емеспіз — біз кеңесші, серіктес, медиатор және ең бастысы — еңбек адамының сенімді тірегіміз. Біз — оның үнін жеткізуші ғана емес, үмітін ақтаушы күшпіз. Сол себепті де кәсіподақ қозғалысының 120 жылдық тарихы — бұл өткенге тағзым ғана емес, бүгінгі атқарар істерімізге жауапкершілік әрі болашақ алдындағы міндет. Біз осы сенімді ақтау үшін жұмыс жасап келеміз және алдағы уақытта да еңбек ете береміз.
Осы айтулы тарихи күнде барша кәсіподақ мүшелерін, әріптестерімді, еңбек жолында жүрген әрбір жанды шын жүректен құттықтаймын! Әрбір жетістіктің артында адам еңбегі тұрады. Сол еңбекті қадірлеу — барлығымыздың міндетіміз. Ынтымағымыз мықты болсын, әділет жолындағы ісіміз берекелі болсын!
Құрметпен, Бердіғали Өмірәлі «Түркістан облысы кәсіподақтар орталығы» аумақтық кәсіподақтар бірлестігінің төрағасы
