Үкімет басшысы бюрократияға жол беруге болмайды деп отыр.
Премьер-министр Олжас Бектенов өңір әкімдіктері мен құзырлы министрліктерге алдағы жылыту маусымына дайындық жүргізуді тапсырды, деп хабарлайды inbusiness.kz сайты.
Премьер-министр жылыту маусымына дайындық әкімдіктердің алдағы үш ай ішіндегі негізгі міндеті екенін еске салды.
"Бірінші. Өңір әкімдіктері барлық конкурстық рәсімдерді екі апта мерзімде аяқтап, жөндеу жұмыстарына нақты кірісуі керек. Басы артық бюрократияға жол беруге болмайды. Биыл іске қосу жоспарланып отырған жаңа жылу нысандары бойынша барлық жұмыстарды тамыз айынан кешіктірмей аяқтау қажет. Әкімдерге жылу нысандарына апта сайын барып, жағдайды жеке бақылауға алуды және барлық туындаған тәуекелдер бойынша шұғыл әрекет етуді тапсырамын", — деді Олжас Бектенов.
Энергетика және Өнеркәсіп министрліктері, өңір әкімдіктері 10 маусымға дейін жылыту маусымына дайындық жоспарларын нақтылау міндеті жүктелді.
"Солтүстік, орталық және шығыс өңірлерде барлық инженерлік инфрақұрылым мен тұрғын үй-коммуналдық шаруашылық объектілері 15-ші қыркүйекке дейін, ал қалған өңірлерде – 15-ші қазанға дейін толықтай әзір болуға тиіс. Үшінші. "KEGOC" компаниясы Энергетика министрлігімен бірлесіп, 15-ші маусымға дейін алдағы жылыту маусымында ұлттық маңызы бар станцияларға арналған жабдықтардың жұмыс режимдерін бекітуі керек. Жөндеу мерзімдерін ауыстыруға немесе жұмыс көлемін азайтуға жол берілмейді. Әрбір факт бойынша меншік иелеріне, сол сияқты басқарушы компанияларға қатысты шаралар қабылданатын болады", — деп атап өтті Үкімет басшысы.
Бұдан басқа Энергетика министрлігі Көлік министрлігімен және әкімдіктермен бірлесіп, 1 қыркүйекке дейін жылу көздерінде отын қорын алдын ала жинақтауы тиіс.
"Үкімет Аппараты өңірлердің жылыту маусымына әзірлік барысына тұрақты негізде бақылау жасап, маған тиісті ақпарат беріп отырсын", — деді Премьер-министр.
