Желіде тараған видеода мектеп басшылығы мұғалімнен алдағы семинарды ұйымдастыруға көмектесуін өтінеді.
Әлеуметтік желіде Алматы облысы Талғар ауданындағы мектептердің бірінің басшылығы мұғалімдерден ақша жинап жатыр деген ақпарат тарады, деп хабарлайды inbusiness.kz сайты.
Әйел нақты қандай көмек керек екенін сұрағанда, әңгімелесуші әр мұғалімнен 2 мың теңгеден жинауды ұсынады және басқа мектептердің көпшілігі бұл ақшаны әлдеқашан тапсырып қойғанын айтады. Алайда әйел қаржылық жағдайына байланысты бұл іске атсалыса алмайтынын түсіндіреді.
Видео жарияланған соң өңірдің білім басқармасы тексеру жүргізді. Оқиға Талғар ауданындағы №8 мамандандырылған мектепте болған.
— Білім басқармасы әлеуметтік желілерде тараған "№8 мамандандырылған мектеп мұғалімдерінен ақша жиналып жатыр" деген ақпаратты тексерді. Ақша жинау туралы дерек расталмады. Алайда мектеп директоры әріптестеріне 2025 жылы 17 қазанда өтетін физика пәні мұғалімдеріне арналған семинарға баннер дайындауға және оқу роботын жалға алуға көмектесуді ұсынған, — делінген Алматы облысы әкімдігінің баспасөз қызметі таратқан хабарламада.
Тексеру қорытындысы бойынша мектеп директорына Қазақстан Республикасының Еңбек кодексінің 64-бабы бойынша қатаң сөгіс түріндегі тәртіптік жаза қолданылды.
