Мәжіліс депутаты Нартай Сәрсенғалиев ішкі істер министрі Ержан Сәденовтен әскердегі әлімжеттік пен заңсыздықты жою тетіктері туралы сұрады, — деп хабарлайды Massaget .kz тілшісі.
Депутаттың сөзінше, былтыр кейінгі үш жылда 270 сарбаз қаза тапқанын айтқан.
"Биылғы қыркүйектің өзінде Алматыда әскерге барғанына бір апта болған азамат қаза тапты. Одан кейін тағы бір азамат оқу-жаттығу жиындарында оққа ұшты. Тағы бір азамат жұмбақ жағдайда қаза тапты", — деді ол.
Нартай Аралбайұлы Ержан Сәденовтен "Құқықбұзушылық профилактикасы туралы" жаңа заң жобасы бұл мәселені қалай шешетінін сұрады.
"Ешқандай жаңалық жоқ (заңда — еск.). ...Әуелден бар нәрсе. Бұл әскердегі заңсыздықтарды жоймайтынына жылдар бойы көзіміз жетті. Бұл мәселені шешудің тетігі қарастырылды ма? Әлде 17-баптағы стандартты күймен шектелеміз бе?" — деп сұрады депутат.
Ішкі министрі Ержан Сәденов депутаттың сауалына былай деп жауап берді:
"Толыққанды шештік, осымен шектелеміз деп айтпаймын. Бірінші отырыс қой. Ұсыныстар болса, қарайық".
Қызықты жаңалықтар мен видеоларды көру үшін TikTok арнамызға жазылыңыз!
