Бельгия халқы да үкіметтің экономикалық саясатына қарсылық білдіріп, көшеге шықты.
Жалпұлттық ереуіл елдегі қоғамдық көлік жүйесі мен әуе рейстеріне кері әсер етіп жатыр. Наразылық шарасын елдегі ірі кәсіподақтар ұйымдастырды.
Жаппай ереуіл елдегі қоғамдық көлік қозғалысын тоқтатып тастады: әуе рейстерінің көбі кейінге шегеріліп, шамамен 48 мың жолаушы діттеген жеріне жете алмады. Метро, трамвай және автобус қозғалысында іркіліс пайда болды. Мектептер мен мемлекеттік мекемелердің жұмыс уақыты шектелді. Кәсіподақтар алпауыт компанияларға салық жеңілдігі мен субсидия беріліп, ал бюджет ауыртпалығы қараша халықтың иығына артылып отырғанына наразы.
Абрис Альпес, Бельгия жалпы еңбек конфедерациясының өкілі:
- Мен ұстазбын. Білім саласында бюджеттік қысқартулар жүріп жатқан соң ереуілге шықтым. Ауруханаларда да үкіметтің әлеуметке қарсы шараларынан зардап шегіп отыр.
Селин Ван Кесель, Бельгия бас еңбек конфедерациясының өкілі:
- Біз мемлекеттік қызметші мәртебесін қорғап, жұмыссыздардың жәрдемақы алу құқығын сақтап қалу үшін күресудеміз. Бұл – өмір сапасы мен қоғам игілігі үшін қажет.
Еңбекақы өсімін шектеу мен түнгі ауысым өтемақысын қысқарту туралы ұсыныстар да халықтың ашу-ызасын туғызды. Мыңдаған адам көшеге шығып, әлеуметтік кепілдіктерді сақтауды талап етті, зейнет жасының ұлғаюына қарсылық білдірді.
Маринн Кокель, Бельгия Христиан кәсіподақтарының өкілі:
- Зейнетақы жүйемізді қорғауымыз керек. Өйткені 67 жасқа дейін лайықты еңбек ету мүмкін емес. Зейнетақы жүйесіне селқос қарау — тек бүгінгі жұмысшылар ғана емес, болашақ ұрпаққа да зиянын тигізеді.
Бельгия үкіметі үнемдеу шаралары ел қаржысын тұрақтандыру және Еуроодақ алдындағы міндеттемелерді орындау үшін қажет дейді. Ереуіл билік пен халық арасындағы сенім дағдарысын айқындады. Ал сарапшылар текетірес ұзаққа созылса, биыл құрылған жаңа коалициялық үкіметтің беделі әлсіреуі мүмкін деп отыр.
Авторлары: Ғалымжан Қараманұлы, Жомарт Ахметов
