Ана болуға ең қолайлы жас қандай? Бұл сұраққа "ЭКОМЕД" адам репродукциясы клиникалары тобы мен NGC Халықаралық репродукция орталығының ғылыми директоры Салтанат Байқошқарова Jibek Joly TV бағдарламасына берген сұхбатында жауап берді, деп хабарлайды KAZ.NUR.KZ.
"Биологиялық тұрғыдан қарасақ, жаратылыстың заңы бойынша әйел адамдар үшін ана атануға ең қолайлы жас 18 бен 25-тің арасы. 25 жастан кейін организмде қартаю процестері басталады. Ұлда да, қызда да солай. 30-35 жастан кейін, тіпті қиындайды. Сырт келбетің әдемі болса да, ішкі ағза, аналық қор жас ұлғайған сайын азая береді. Сондықтан ертерек отбасын құрып, ұрпақты болуға тырысу керек", — дейді Салтанат Байқошқарова.
Маманның сөзінше, ұрпақты болу мүмкіндігі әйелдерге қарағанда ер адамдарда көбірек. Дегенмен мүмкіндігінше жиі тексеріліп отыру керек.
"Қыз бала 18 жасқа толғанда гинеколог-репродуктологқа, ер бала уролог-андрологқа бару керек. Өйткені қазір медицинаның арқасында ұрпақты болу мүмкіндігіңізді анықтауға болады. Дәрігерге қайта-қайта барудың қажеті жоқ. Тек бір рет тексерілсе болды. Бір тексерістен-ақ, қыз баланың аналық қорының өз жасына сәйкестігін білуге болады", — деді профессор.
Дәрігер репродуктивті жастың негізгі кезеңдері туралы айтты: 18–29 жас — фертильділік шақтың шыңы. Бұл кезде жүкті болу ықтималдығы — 20–25 пайыз. 30–34 жас — фертильдік деңгейі біртіндеп төмендей бастайды. Ал 40 жастан әрі қарай жүкті болу мүмкіндігі 66 пайызға дейін төмендейді, дейді маман.
Мәтіннен қате тапсаңыз, бізге жазыңыз
