Қытай Ұлы Жібек жолының бойындағы елдермен арадағы сауда-саттықты арттыруға ерекше екпін қоюда.
Мұны Шыңжаң-Ұйғыр автономиялық ауданы үкіметінің сыртқы байланыс жөніндегі кеңсе басшысының орынбасары Сяо Евэнь мәлімдеді, деп хабарлайды inbusiness.kz сайты.
Елдің БАҚ өкілдерінен құралған делегациямен кездесу барысында ол Қазақстанды жақын көрші және достық пейілдегі мемлекет ретінде қабылдайтынын айтты. Әрі Шыңжаң-Ұйғыр автономиялық ауданы Қазақстанға өте жақын орналасқандықтан, түрлі салада қарым-қатынас өрбіп келетінін алға тартты.
– Биыл маусым айында Астанада "Орталық Азия – Қытай" саммиті табысты өткенін білеміз. Оның аясында Қазақстан президенті Қасым-Жомарт Тоқаев пен ҚХР төрағасы Ци Цзиньпин кездесті. Атап айтқанда, бұл саммитте бірқатар уағдаластыққа қол жеткізіліп, Орталық Азия елдерімен бірлесе маңызды жобалар жүзеге асырылады. Жалпы, бұл процесте бұқаралық ақпарат құралдарының рөлі де маңызды, – деді Сяо Евэнь.
Оның сөзінше, Қытайда ресми түрде 56 ұлт бар және оның барлығы Шыңжаңда тұрып жатыр. Сонымен қатар, Сяо Евэнь қазақтың айтыс өнерін дамытуға, дәріптеуге көңіл бөліп отырғанын тілге тиек етті.
– Этностардың барлығы тату-тәтті өмір сүріп, бір-біріне қолдау жасап келеді. Тұрғындар елдердің дәстүрін, мәдениетін сақтайды. Мәселен, ұйғырлардың рухани қазынасы саналатын "он екі мұқам" саз өнерін, қазақтардың "айтыс" өнерін, қырғыздардың "Манас" жырын дәріптеуге мән береміз. Осының бәрі ұрпақтан-ұрпаққа беріліп келеді. Мәдени ерекше өнерді тамашалау үшін шетел мен Қытайдың өзге өңірлерінен туристер ағылып жатыр. Мұнымен қоса, ҚХР заңы бойынша Шыңжаң-Ұйғыр автономиялық ауданы аумағында қытай тілімен қатар, өңірдегі басқа да ұлт өкілдерінің тілін сақтауға назар аударып отырмыз. Сондықтан, бізде баспа материалдары қытай, қазақ, ұйғыр, қырғыз, моңғол тілдерінде жарияланады, – деді Шыңжаң-Ұйғыр автономиялық ауданы үкіметінің сыртқы байланыс жөніндегі кеңсе басшысының орынбасары.
Бүгінде аудан аумағында 100-ден аса газет басылып жатыр. Сондай-ақ, 120 журнал мен 52 газет аз ұлт өкілдерінің тілінде жарияланады. Ал Шыңжаң телерадио станциясы бағдарламаларын бес тілде таратып жүр.
