Олардың қарызы 180 млрд теңгеге жеткен.
Қаржы вице-министрі Ержан Біржанов үкімет брифингінде 45 200 қазақстандық азамат ресми түрде банкрот деп танылғанын айтты.
Олардың қаржы ұйымдарының алдындағы қарызы 180 млрд теңгеге жеткен. Қарыздың басым бөлігі – екінші деңгейлі банктердегі несиелер.
"Бүгінде 45 200 адам банкрот деп танылып, жалпы қарыздарының сомасы 180 млрд теңгені құрады. Оның барлығы кешірлід деп айтуға болады. Көбінесе банктен алған ақша. Олардың ішінде 13 мың адам бес жыл бойы қарызын өтемей, көп жыл борышкер боп жүргендер", – деді Ержан Біржанов.
Вице-министрдің сөзінше, 2,5 мыңы – халықтың әлеуметтік осал тобынан шыққан адамдар.
"Банкроттыққа өтініш беретін адамдардың активі болмауы керек. Банкроттыққа өтініш бергендердің көпшілігінің астында көлігі, басында баспанасы бар. Олар банкрот деп таныла алмайды. Мұндай жағдай көп", – деді вице-министр.
Оқи отырыңыз: Банкрот деп танылған адамның проблемалық қарызы бюро базасында болмаса да толық кешіріледі
2023 жылғы 1 наурыздан бері Қазақстанда банкрот деп тануға 270 мыңнан астам өтініш қабылданған.
