Мемлекеттік қолдау жүйесінің жекелеген қатысушылары бюджет ақшасын мақсатына сай пайдаланбай отыр.
Мемлекеттік сатып алуда жасанды интеллект элементтерін енгізу арқылы үнемделген қаражат көлемі 781 млрд теңге болды. Бұл туралы Қаржы министрі Мәди Такиев айтты, деп хабарлайды inbusiness.kz сайты.
"Бүгінде министрлік мемлекеттік сатып алуда жасанды интеллект элементтерін енгізуде. Мәселен, конкурстар рейтингтік-баллдық жүйені пайдалана отырып өткізіледі: мұнда конкурстық комиссия құрылмайды, жеңімпазды таңдау автоматты түрде жүзеге асырылады, нәтижелерге шағым жасалмайды. Үнемделген қаражат көлемі 781 млрд теңгені құрады", – деді Мәди Такиев Үкімет отырысында.
Оның айтуынша, нақты секторда бақылауды күшейту шеңберінде кірістерді жасыруға және бухгалтерлік деректерді бұрмалауға жол бермеу үшін тәуекел бейіндері әзірленіп жатыр.
"Нәтижесінде 1,5 трлн теңгеге сапасыз жоспарлау анықталды. Цифрлық трансформация аясында бюджеттік онлайн мониторинг енгізілді, ол бюджет қаражатының жұмсалуына бақылауды күшейтуге бағытталған. Қазіргі уақытта білім беру саласының өзінде қаражатты жұмсау кезіндегі бұзушылықтардың алдын алу, және тәуекелдерді анықтауда айтарлықтай оң нәтижелер алынды. Жасанды интеллект элементтерін қолдану арқасында тәуекелді төлемдерінің сомасы 2024 жылы 307 млрд теңгеге және 2025 жылы 132 млрд теңгеге анықталды.
Мәселен, аудандық білім бөлімдерінің қызметкерлеріне бір айда 65 млн теңгеге дейін төлем жасалған немесе 10 млн теңгеден астам сыйақы аударылған. Тағы бір мысал, бір шот немесе бір жеке сәйкестендіру нөмірін көрсете отырып, әр түрлі адамдардың аты-жөнімен айына 66 төлем жасалған", – деді ведомство басшысы.
Жүргізілген тексерулердің нәтижелері мемлекеттік қолдау жүйесінің жекелеген қатысушылары бюджет қаражатын мақсатына сай пайдаланбай отырғанын көрсеткен.
"Кейбір ұйымдар қаржы институттары болмаса да, бөлінген қаражатты кредит беруге және пайыз түрінде табыс ала отырып, оларды депозитке орналастыруға пайдаланған. Мысалы, бөлінген 1 млрд теңге бюджеттік кредитті депозитке салу арқылы 80 млн теңге пайда көрген фактілер анықталды. Бір мал басына 808 млн теңгеге бірнеше рет субсидия алу жағдайлары да орын алды", – деді министр.
