Әкімдік мәліметінше, жаңарту жұмыстары тұрғындардың өтініші негізінде қолға алынған.
Алматының Алмалы ауданында қала тұрғындары үшін тағы бір демалыс аймағын абаттандыру жұмыстары басталды. Қазіргі жөндеу жұмыстары Розыбакиев пен Төле би көшелерінің қиылысында, Розыбакиев көшесінің бойында жүргізіліп жатыр, деп хабарлайды Алматы әкімдігі.
Аудан әкімі осы аптада жергілікті тұрғындармен кездесіп, алдағы жұмыстардың жоспарын таныстырды.
Әкімдік мәліметінше, жаңарту жұмыстары тұрғындардың өтініші негізінде қолға алынған. Бұған дейін дәл осы көшеде, Розыбакиев пен Дүйсенов көшелерінің қиылысында "Халық қатысатын бюджет" жобасы аясында жаңа саябақ салынған болатын. Ашылған сәттен бастап бұл сквер аудан тұрғындарының сүйікті демалыс орнына айналды. Ал енді оның жоғары жағында, Төле би көшесіне жақын орналасқан екінші сквер он жылға жуық уақыттан бері жөндеу көрмеген. Биыл бұл аймақты жаңарту жоспарға енгізілді.
Абаттандыру жұмыстары аясында:
- заманауи жарықтандыру жүйесі орнатылады (кабель ауыстыру, жаңа тіректер қою);
- жасыл желек көлемі ұлғайтылады — көгал төселіп, бұталар мен ірі ағаштар отырғызылады;
- автоматты және тамшылатып суару жүйелері орнатылады;
- демалыс пен спорт аймақтары абаттандырылып, жаттығу құрылғылары, әткеншектер, перголалар, орындықтар мен қоқыс жәшіктері қойылады.
Оқи отырыңыз: Алматыда қазіргі заманғы "Алатау" теннис орталығы ашылды
Жаңарту аяқталған соң, екі көршілес аумақ — өткен жылы салынған саябақ пен биыл жөнделіп жатқан сквер — біртұтас жасыл кеңістікке айналады. Қараша айының соңына дейін тұрғындар Розыбакиев көшесінің батыс жағындағы, Төле би мен Дүйсенов көшелерінің аралығында кең әрі көрікті демалыс аймағында серуендеп, спортпен шұғылданып, таза ауада демала алады.
Алмалы ауданының әкімдігі қалалық ортаны жүйелі түрде жаңарту арқылы ауданның экологиялық келбетін жақсартып, тұрғындар үшін барынша жайлы әрі қолайлы жағдай жасауды жалғастырып келеді.
