Жылыту кезеңінде ірі технологиялық бұзушылықтар байқалмады.
Энергетика вице-министрі Сұңғат Есімханов жылыту маусымы тұрақты өткенін айтты, деп хабарлайды inbusiness.kz сайты.
2024-2025 жылдардағы күзгі-қысқы кезең аяқталды.
"Үкіметтің жүйелі жұмысының арқасында ол тұрақты өтті. Жылыту кезеңінде ірі технологиялық бұзушылықтар байқалмады.
2024 жылы қабылданған шаралар энергия көздері бойынша жөндеу жұмыстарын қаржыландыруды өткен жылғы деңгейден 44%-ға артық 327 млрд теңгеге дейін ұлғайтуға мүмкіндік берді. Жылу желілерінде жөндеу жұмыстарын қаржыландыру 28%-ға 148 млрд теңгеге дейін ұлғайтылды", – деді вице-министр Үкімет отырысында.
Сөзінше, электр станцияларында жөндеу кестесіне сәйкес 10 энергия блогына, 55 қазандыққа, 45 турбинаға жөндеу жүргізілді.
Электр желілерінде 21 мың км электр беру желілері, 423 қосалқы станция жөнделді. 542 км жылу желілерін қайта құру және ауыстыру жүргізілді.
"Өткен күзгі-қысқы кезеңде энергия көздерінің отын қоймаларында 5,4 млн тоннаға дейін көмір және 141 мың тонна мазут жинақталды", – деді Сұңғат Есімханов.
