Қазір Қазақстанда 16 мың әйел және төрт мың ер азамат «бедеулік» диагнозымен тіркеуге алынған . 2021 жылдан бері Президент тапсырмасымен «Аңсаған сәби» бағдарламасы іске қосылды. Соның аясында жылына жеті мың квота бөлінеді.
Егер елде жылына жалпы 18 мыңға жуық денеден тыс ұрықтандыру жасалса, соның жеті мыңы осы бағдарламамен жүргізіледі. Алайда квотаны бәрі бірдей ала алмайды. Қазақстанның репродуктивті медицина қауымдастығының вице-президенті Алмагүл Ахметова "Аңсаған сәби" бағдарламасына қатысу тәртібін түсіндірді.
Алмагүл Ахметова, Қазақстанның репродуктивті медицина қауымдастығының вице-президенті:
- «Аңсаған сәби» бағдарламасына қатысушылар біріншіден, репродуктивтік жастағы адам болу керек. Бұл — 18 бен 42 жас аралығындағы жұптар. Медициналық көрсеткіштер немесе ер азаматтың денсаулығына байланысты кедергілер болса, жылына бір рет тегін экстракорпоральды ұрықтандыру жасатуға мүмкіндік бар. Ол үшін азаматтар өздерінің емханаларына тіркеліп, анализдер тапсыру керек. Кейін «бедеулік» деген диагноз қойылса, сонымен репродуктивті денсаулық орталығына баруы тиіс. Ол жерден репродуктологтың қорытындысын алады. Осы тұста науқастар медицицналық сақтандыру жүйесінде болуы шарт. Сосын ол жұпқа МӘМС бойынша тегін ем көрсетіле ме, жоқ па оны комиссия шешеді.
