Қытайда өткен беделді көпкүндік "Тайху көлі туры" өз мәресіне жетті.
Жарыстың соңғы кезеңінің спринтінде XDS Astana Team командасының италиялық велошабандозы Маттео Малучелли топ жарып, жеңіс тұғырына көтерілді. Бұл нәтиже оған жалпы есепте көшбасшылық орнын нығайтуға мүмкіндік беріп, Турдың бас жүлдесін жеңіп алуына жол ашты.
Малучелли бұнымен тоқтап қалған жоқ. Ол жарыстың ұпай классификациясында да үздік атанып, қос жеңіске жетті. Ал XDS Astana Team командалық есепте де бірінші орынды иеленіп, турды керемет нәтижемен аяқтады.
Биылғы маусымда бұл жеңіс Малучеллидің сегізінші, ал команда үшін 31-ші жеңісі болып тіркелді.
"Бір күнде кезең мен жалпы есепте жеңіске жету — тамаша нәтиже. Команда өте керемет жұмыс атқарды. Біз жарысты толық бақылауда ұстадық, соңғы шақырымдарда қарсыластарды қуып жеттік. Ал маған тек жақсы спринт өткізу қалды. Әрине, соңғы метрлер жүйкеге салмақ түсірді. Бәрі секундтармен шешілді. Бірақ ойдағыдай аяқталды. Бұл менің маусымдағы соңғы жарысым, енді сегіз жеңіспен демалуға және жаңа маусымға дайындалуға уақыт келді", — деді Малучелли.
XDS Astana Team маусымды тағы да тамаша аяқтап, әлемдік велоспорт сахнасында Қазақстан атын тағы да биікке көтерді.
