Көкшетауда қаржы пирамидасын ұйымдастырушылар 60-қа жуық салымшының сеніміне кіріп, олардан түскен 136 млн теңгені өз пайдасына жұмсады деген күдікпен тергелді, деп хабарлайды KAZ.NUR.KZ ҚМА баспасөз қызметіне сілтеме жасап.
Ведомство мәліметінше, ҚМА Ақмола облысы бойынша департаменті прокуратураның үйлестіруімен Көкшетау қаласындағы S-Group қаржы пирамидасының құрылымдық бөлімшесінің басшыларына қатысты тергеуді аяқтады.
"Ұйымдастырушылар S-Pharmaceutical және өзге де жобаларға инвестиция тарту сылтауымен салымшыларға әрбір жаңадан тартылған қатысушыға салым сомасының 5 пайызы мөлшерінде табыс уәде еткен.
Қатысу үшін сайтта тіркеліп, кем дегенде 100 АҚШ долларынан бастап салым жасау талап етілген", — дейді ҚМА өкілдері.
Айта кетсек, күдіктілердің бірі бұған дейін Life Is Good және Finiko қаржы пирамидаларына қатысып, онда табыс тауып, кейін осындай схема арқылы өз жобасын құрған.
Нәтижесінде қаржы пирамидасына 59 азамат тартылған, олар жалпы 136 млн теңгеден астам қаражат салған.
"Күдіктілер салымшылардың ақшасына елордадан екі пәтер мен автотұрақ орнын сатып алған, оларға соттың санкциясымен тыйым салынды. Үш ұйымдастырушыға қатысты қозғалысын шектеу және тәртіп сақтау туралы қолхатпен бұлтартпау шарасы қолданылды", — делінген хабарламада.
Қылмыстық процессуалдық кодекстің 201-бабына сәйкес, өзге ақпарат жарияланбады.
Мәтіннен қате тапсаңыз, бізге жазыңыз
