Орал қалалық сотында облыстық жұқпалы аурулар ауруханасының бас бухгалтеріне қатысты үкім шықты.
БҚО сотының баспасөз қызметінен мәлім еткеніндей, бухгалтер әйел ҚР ҚК 189-бабына (сенiп тапсырылған бөтен мүлiктi иемденiп алу немесе талан-таражға салу) сәйкес айыпты деп танылып, 7 жылға бас бостандығынан айыру жазасына кесілді, деп хабарлайды inbusiness.kz сайты.
Ол сонымен қатар осы мерзімге ұйымдарда материалдық жауапкершілік лауазымдарды атқару құқығынан айырылды.
Сот талқысында белгілі болғанындай, әйел жұқпалы аурулар ауруханасында 2005 жылдан бастап жұмыс істейді. Аурухана директоры оған сеніп, ЭЦҚ-сын берген. Осыны еркін пайдаланған бухгалтер көптеген заңсыз қаржылық операциялар жасаған. Сөйтіп бір жылға жетпей 35,7 млн теңге бюджет қаржысын жымқырып, талан-таражға салған. Сотта айыпталушы әйел кінәсін толық мойындады.
Оның айтуынша, бұл ісі отбасылық жағдайымен байланысты. Тұңғыш ұлы мен кіші ұлының әйелі есірткі қолданып нашақорлыққа салынған. Үйде үнемі осы үшін ұрыс-керіс. Ұрланған ақшаны отбасын асырап, трамадол және психотроптық заттар сатып алуға жұмсаған. Оған қоса әйелдің қолында 79 жастағы анасы да болған.
Сот үкімі заңды күшіне енген жоқ.
