Италиялық Chicco бренді Қазақстанда өз өндірісін іске қосуды жоспарлап отыр. Кәсіпорын Алматы облысындағы жаңа Алатау қаласында орналасады, деп хабарлайды Zakon.kz.
Бұл туралы облыс әкімі Марат Сұлтанғазиев өзінің жаңа Instagram-дағы парақшасында жазды. Оның айтуынша, UNITED HYGIENE зауытының базасында Chicco маркасымен балалар жөргектері мен ылғал сүлгілер шығарылады.
"Халықаралық брендтің келуі – шетелдік инвесторлардың өңірге деген жоғары сенімінің көрінісі. Алатау қаласы әлемдік компаниялар өз болашағын көретін өндірістік орталыққа айналуда", – деді облыс әкімі.
Публикация от Marat Eleusizuly Sultangaziev (@marat_sultangaziyev)
Жобаның жалпы құны — 10 миллиард теңге. Оның жүзеге асырылуы нәтижесінде 200–250 жаңа жұмыс орны ашылады.
Зауыттың сапалы өнімдері ішкі нарыққа ғана емес, сонымен қатар Ресей, Грузия, Әзербайжан және Өзбекстан елдеріне экспортталатын болады (экспорт үлесі – 50%).
Марат Сұлтанғазиевтің айтуынша, бұл жоба өңір экономикасын нығайтып, инвестициялық тартымдылығын арттыруға бағытталған маңызды қадам болмақ.
