"Ауылда сапалы ауыз су жоқ" деген Ұлытау облысындағы Кеңгір ауылының тұрғындары жанайқайын жеткізді. Олардың айтуынша, елдімекендегі 2,5 мың адам 10 жылдан бері тіршілік нәрін ашық су қоймасынан алады, деп хабарлайды "Хабар" арнасы.

Крандағы су ішуге жарамаған соң әкімдік ауыл ішіне су тазалайтын бірнеше сүзгі орнатып берген. Ауыл әкімі "су тазалайтын блок уақытша жасалған дүние" дейді. Осы айдың соңына дейін елді мекенге жерасты суын жалғап береміз деп отыр. Кеңгір ауылының тұрғындары ауыз суды ертеден ашық су қоймасынан тұтынады. Бірақ ол кезде тіршілік нәрі сүзгіден өтетін.

Жарты ғасырдан бері осы ауылда тұратын Сәрсенкүл Самжүрекованың айтуынша 2016 жылы су тазартатын қондырғы істен шыққан. Содан бері жұрт краннан су ішпейді.

"Ыдыс жуамыз, шомыламыз. Шомылғанның өзінде сода мен тұз саламыз. Өйткені көлдің суы иісі жаман болып келеді. Бұны ешқашан іше алмаймыз", — дейді Кеңгір ауылының тұрғыны Сәрсенкүл Самжүрекова.

Шамасы жеткендер үйіне сүзгі қойып алған. Ал оған мүмкіндігі жоқтар ауызсуды қысы-жазы тасып ішеді. Ол үшін ауыл орталығына су тазалайтын үш сүзгі орнатылған. Тұрғындардың айтуынша оның өзі арнайы кестемен жұмыс істейді.

"Енді біз осы арқылы су ішеміз. Осыны орнатқанына да рақмет. Фильтр болғаннан кейін темір сынды керекті заттардың бәрі өледі ғой. Ал табиғи су болса, тамаша болар еді. Бірақ енді амал жоқ осыдан су ішіп жатырмыз", — дейді Кеңгір ауылының тұрғыны Төлеутай Асанов.

Ауыл әкімдігі сапалы ауызсу ішетін күн алыс емес дейді. Қазір 70 шақырым жердегі Есқұла жерасты қорынан Жезқазғанға құбыр тартылып жатыр. Кеңгір ауылының су жүйесі сол құбырға қосылады.

"Бүгінгі күні жөндеу жұмыстарына байланысты кідіріп жатыр. Сол жұмыстар аяқталғаннан кейін Кеңгірге су беріледі. Біздің құбырлар Есқұлаға жалғанып тұр, тек "задвижкалар" жабық. Су берген уақытта біз "задвижкаларды" ашуға дайынбыз", — дейді Кеңгір ауылының әкімі Рүстем Есмағанбетов.

Жауапты мамандардың айтуынша, су құбырындағы жөндеу жұмыстары осы айдың соңына дейін аяқталуға тиіс. Қараша айының алғашқы онкүндігіне дейін жерасты суын жеткіземіз дейді.

Авторлар: Елдос Кәкенов, Нұрлан Исмаилов

Мәтіннен қате тапсаңыз, бізге жазыңыз