Қарағанды облысы Нұра ауданында шаруа қожалығының иесі жеріне түскен жылқыларды қырып тастады. Алқабының егіні орылса да, қаруын кезенген диқан 17 жылқыны атып арам қатырған, — деп хабарлайды Massaget.kz тілшісі "КТК" телеарнасына сілтеме жасап.
Егіні орылған алқапта жайылған бір үйір жылқыны бақташы қарап жүрген екен. Оның айтуынша, көлігімен құйғытып келген шаруа қожалығының иесі оқты қарша боратқан. Жылқылар мен бақташы жан-жаққа қаша жөнелген.
Ал диқан бірді-екілі емес, қатарынан 17 бас жылқыны баудай түсірді. Оның ішінде үшеуі ғана аман қалған. Арам қатқан 14 жылқы ит-құсқа жем боп, сайын далада сасып қалды. Оқиғадан кейін полиция қожалық иесінің көлігінен оқ-дәрі тапқан. Ал мылтық жоқ болып шықты. Куәгерлер күдіктіде қару болғанын растаған. Полицейлер соталды тергеуді бастады.
"Бөтеннің мүлкін қасақана жою дерегі бойынша қылмыстық іс қозғалды. Бұл қылмысты істеді деген күдікпен полиция қызметкерлері Нұра ауданының 53 жастағы тұрғыны анықталып, полиция бөліміне жеткізілді. Оқиғаның барлық мән-жайын толық әрі объектив анықтауға бағытталған тергеу жүріп жатыр", — деді Қарағанды облысы ПД баспасөз хатшысы Бақытжан Құдияров.
Қызықты жаңалықтар мен видеоларды көру үшін TikTok арнамызға жазылыңыз!
