Футболдан Қазақстан ұлттық құрамасы бас бапкерінің міндетін уақытша атқарушы Талғат Байсуфинов Дінмұхаммед Қашкенді не үшін ұлттық құрамаға шақырғанын айтты. Бұл туралы Kazinform агенттігіне сілтеме жасаған KAZ.NUR.KZ хабарлайды.
Ақпарат агенттігінің жазуынша, ұлттық құраманың Лихтенштейнге қарсы ойыны алдында баспасөз мәслихаты өткен. Байсуфинов журналистердің сұрағына жауап бере отырып, Дінмұхаммед Қашкенге қатысты сауалға да жауап берген.
Ол футболшыны не үшін ұлттық құрамаға шақырғанын түсіндірген. Айтуынша, жас ойыншының деңгейін алдағы уақытта жақынырақ тану үшін оған мүмкіндік берілген.
"Жаттығу жиыны басталар алдында біз орталық қорғаушылардан екі ойыншы жарақат алуына байланысты бір орталық қорғаушы керек деп шештік. Сол уақытта маған ҚПЛ-дың барлық ойыншысы қамтылған кең деректер базасы ұсынылды.
Осы базадағы деректерге байланысты негізгі және резервтегі тізім жасалды. Дінмұхаммед Қашкеннің кейінгі көрсеткіштері бағаланып, жас ойыншының деңгейін алдағы уақытта жақынырақ тану үшін оған мүмкіндік берілді", — деді Байсуфинов.
Талғат Маруаұлы Дінмұхаммед Қашкеннің ұлттық құрамаға шақырылуы басқа да ойыншыларға үміт сыйлайтынын айтып, оны қолдауға шақырды.
"Олар да өзін көрсетіп, ұлттық құрама сапына қосылуға ұмтылуы керек. Біздің есігіміз барлық ойыншыға ашық", — деді ол.
Айта кетейік, бұған дейін Лихтенштейн мен Солтүстік Македонияға қарсы ойындарға шақырылған ұлттық құрама футболшыларының нақты тізімі жарияланған еді.
Тізімде "Жетісу" клубының ойыншысы, қорғаушы Дінмұхамед Қашкен де бар. Алайда оның ұлттық құрама сапына шақырылуын кейбір желі қолданушылары сынға алды.
Мәтіннен қате тапсаңыз, бізге жазыңыз
