9 қазанда Владимир Путин мен Ильхам Әлиев Душанбеде кездесті. Бұл президенттердің өткен жылы әзербайжандық ұшақ апатынан кейінгі алғашқы жүзбе-жүз кездесуі, деп хабарлайды 24.kz.
Ресей президентінің айтуына қарағанда, тергеу аяқталуға жақын және апаттың бірнеше себебі белгілі болған.
"Бірінші себебі Ресей шекарасынан өткен үш украиналық дрон. Екінші себеп — Ресейдің Әуе қорғанысы жүйесіндегі техникалық ақаулар. Ал ұшырылған екі зымыран лайнерге тікелей соққы жасаған жоқ. Олай болған жағдайда ұшақ сол сәтте жерге құлап, жарылатын еді. Бәлкім шамамен 10 метр жерде өзін өзі жою әрекеті іске қосылған. Зымырандардың сынықтары ұшаққа тиген. Сондықтан ұшқыш мұны құстармен соқтығысу ретінде қабылдады. Ол ресейлік диспетчерлерге осылай деді және мұның бәрі "қара жәшіктерде" жазылған", — дейді Владимир Путин.
25 желтоқсанда Бакуден Грозныйға бет алған Аzerbaijan Airlines (AZAL) әуекомпаниясына тиесілі ұшақ Ақтау маңында апатқа ұшырады. Ұшақ бортында 67 адам болған, оның бесеуі – экипаж мүшесі.
Бортта Әзербайжанның 42, Ресейдің 16, Қазақстанның алты, Қырғызстан үш азаматы болған.
Ұшақ апатынан 38 адам қаза тапты. Олардың үшеуі – экипаж мүшесі. Өкінішке қарай, аман қалғандардың арасында қазақстандықтар жоқ екені хабарланды.
АZAL әуекомпаниясы ұшағының апатқа ұшырау фактісі бойынша Қазақстан Ішкі істер министрлігі Қылмыстық кодексінің 344-бабының 3-бөлігі, яғни екі немесе одан да көп адамның өліміне әкеп соққан әуе көлігінің қозғалысы немесе пайдалану қауіпсіздігі қағидаларын бұзу бойынша қылмыстық іс қозғады.
Әзербайжан астанасында аза тұту күні жарияланды.
26 желтоқсанда Euronews агенттігі Әзербайжан үкіметіндегі дереккөзге сілтеме жасап, Ақтаудағы қайғылы оқиғаға Ресейдің Грозный үстінен ұшырылған зымыраны себеп болғаны туралы ақпарат жариялады.
Кейін Ресей авиациясының басшысы Дмитрий Ядров 25 желтоқсанда Embraer жолаушылар ұшағының Маңғыстауда апатқа ұшырауына қатысты мәлімдеме жасады. Ол Қазақстанға құлаған жолаушы ұшағы Грозный әуежайына "Ковер" режиміне байланысты қона алмағанын, Шешенстан астанасы әуе кеңістігінде мұндай режим Украина шабуылына байланысты енгізілгенін жеткізді.
Бұдан бөлек, Ресей президенті Владимир Путин Әзербайжан президенті Ильхам Әлиевпен телефон арқылы сөйлесіп, РФ әуе кеңістігінде болған қайғылы жағдай үшін кешірім сұрады. Сондай-ақ Ресей Тергеу комитеті осы жайт бойынша қылмыстық іс қозғағаны белгілі болды.
Өз кезегінде Әзербайжан президенті Ильхам Әлиев Әзербайжан телеарнасына берген сұқбатында ұшақтың апатқа ұшырауына себеп болуы мүмкін фактілерді атады.
Сондай-ақ ол ұшақ апатынан қаза болған марқұмдардың отбасымен кездесу кезінде әділдікті, сондай-ақ кінәлілерді жазалауды талап ететіндерін мәлімдеді.
Ақтау маңындағы ұшақ апатына қатысты мәлімет
Ақтаудағы ұшақ апаты
- Дубай-Мәскеу бағытында ұшқан ұшақ Каспий теңізінің үстінде апаттық дабылды қосты
- "Көз жасын тыя алмады": Ақтаудағы әуе апатында бір-бірінен көз жазып қалған ерлі-зайыпты табысты (видео)
Мәтіннен қате тапсаңыз, бізге жазыңыз
