Палестиналық ХАМАС қозғалысы Израильмен жасалған келісімді растайтыны туралы ресми мәлімдеме жасады, деп хабарлайды Bloomberg-ке сілтеме жасаған KAZ.NUR.KZ.
Агенттік тілшілерінің қозғалыс мәлімдемесіне сілтеме жасап хабарлауынша, ХАМАС "Газадағы соғысты тоқтату, оккупация күштерін шығаруды қамтамасыз ету, гуманитарлық көмек жеткізу және тұтқындарды алмасуды жеңілдету" туралы келісімге келгенін растады.
Мәлімдемеде ХАМАС арағайындық жасаған Қатар, Мысыр және Түркияның күш-жігерін жоғары бағалайтыны және "АҚШ президенті Дональд Трамптың күш-жігерін" бағалайтыны айтылған.
Сонымен қатар ХАМАС өкілдері Трамп пен басқа да ел көшбасшыларын Израильдің шартты орындауын қамтамасыз етуге шақырды. Мәлімдемеде ХАМАС "азаттық, тәуелсіздік және өзін-өзі билеу құқығына қол жеткізбейінше, халқының ұлттық құқықтарынан ешқашан бас тартпайтыны" да баса айтылған.
Айта кетейік, АҚШ президенті Дональд Трамп TruthSocial желісінде Израиль мен ХАМАС бейбітшілік жоспарының бірінші кезеңі аясында келісімге қол қойғанын хабарлады.
"Мен Израиль мен ХАМАС-тың бейбітшілік жоспарымыздың бірінші кезеңіне қол қойғанын мақтанышпен хабарлаймын", — деді Трамп жазбасында.
Келісімде ХАМАС жақын арада барлық тұтқынды босатады, ал Израиль "берік, ұзақмерзімді және мәңгі бейбітшілік жолындағы алғашқы қадам ретінде" келісілген сызыққа дейін өз әскерін шығарады делінген.
Еске сала кетейік, Қазақстан президенті Қасым-Жомарт Тоқаев Газа секторындағы қақтығысты тоқтату және тұтқынға алынған адамдарды босату туралы келісімді қолдайтынын жеткізді.
Мәтіннен қате тапсаңыз, бізге жазыңыз
