2025 жылғы 1 қазанда Көлік министрінің міндетін атқарушының бұйрығымен Қазақстан Республикасының әуежайларында жолаушыларға қызмет көрсету қағидаларына өзгерістер енгізілді
Бұл туралы Caravan.kz медиа порталы zakon.kz-ке сілтеме жасап хабарлайды.
Атап айтқанда, ұшу және келу кезінде шекаралық бақылаудан өту тәртібі нақтыланды.
Құжатта шекаралық бақылаудан өту кезінде жолаушылар үшін рәсімнің қарапайым әрі жылдам болуы, сондай-ақ қызметкерлердің сыпайы және сәлемдесіп тұруы қамтамасыз етілуі тиіс екені көрсетілген.
Сонымен қатар келесі талаптар енгізілді:
- Ұшу/келу кезінде жолаушылардың рәсімдерден өту уақытына қатысты әуежай стандарты болуы және ол шекара қызметімен келісілген болуы тиіс;
- Бақылаудан өтуге дейін жолаушыларға рәсімдер талаптары туралы қолжетімді ақпарат ұсынылуы қажет;
- Паспорттық бақылауда жолаушыларға қызмет көрсету жылдамдығы шекара қызметімен келісіліп, оның орындалуы бақылануы тиіс;
- Жылына бір миллионнан астам жолаушы өтетін әуежайларда автоматтандырылған паспорттық бақылау жүйесі болуы шарт. Мұндай жүйемен жабдықтау міндеті сенімгерлік басқаруға немесе жекеменшікке берілген әуежай операторына жүктеледі;
- Жолаушылар ағынына байланысты шекаралық бақылау қызметі персоналының тәуліктік жұмыс кестесі әуежаймен келісіліп, өткізу қабілетін жедел арттыру мүмкіндігі қарастырылуы керек;
- Қызметкерлердің сыртқы келбетіне қойылатын талаптар стандарты бекітіліп, оның орындалуы бақылануы тиіс.
Бұйрық 2025 жылғы 19 қазаннан бастап күшіне енеді.
