Тұңғыш Президент музейі қорына Бүрлен Әділетқызының велосипеді салтанатты түрде табысталды. Бұл велосипед оның ерекше сапары мен тарихи Отанына деген шынайы сүйіспеншілігінің нышанына айналды.
Бүрлен Әділетқызы 2003 жылы 26 қарашада Қытай Халық Республикасының Шыңжаң-Ұйғыр автономиялық ауданындағы Тарбағатай аймағы, Дөрбілжін ауданында дүниеге келген. 2024 жылы ол жоғары оқу орнын «информатика» мамандығы бойынша тәмамдап, өміріндегі ең батыл әрі ерекше шешім қабылдап, тарихи Отаны Қазақстанға велосипедпен жол тартты.
20 жастағы бойжеткен бір айдың ішінде екі мың шақырымнан астам жол жүрді. Сапар барысында аптап ыстыққа, техникалық қиындықтар мен сан түрлі күтпеген кедергілерге тап болды. Дегенмен, Бүрлен төзімділігімен, табандылығымен және туған жеріне деген ыстық ықыласымен бар сынақты еңсере білді.
Бүрленнің айтуынша, бұл сапар оның өміріндегі тек физикалық сынақ емес, рухани жаңғыру мен отаншылдық сезімді терең түйсінудің мектебі болған. Ол өз бастамасы арқылы салауатты өмір салтын дәріптеп, жастарды белсенді болуға, елге қызмет етуге жігерлендіруді мақсат тұтқан.
Оның велосаяхаты Қазақстан мен Қытай арасындағы дипломатиялық қатынастардың тереңдеп, визасыз режим мен мәдени байланыстардың нығайған кезеңімен тұспа-тұс келді. Сонымен қатар, бұл сапар «Бір белдеу – бір жол» бастамасының 10 жылдығымен сәйкес келіп, тарихи және символдық мәнге ие болды.
Сапарда сенімді серігі болған велосипед ерік-жігердің, табандылықтың және рухани биіктіктің белгісіне айналды. Оны Музейге тарту ете отырып, Бүрлен алғысы мен құрметін білдірді.
Бүгінде Бүрлен Әділетқызы Қазақстан Республикасының азаматы атанып, отбасымен бірге Астанада тұрады. Ол білімі мен жинаған тәжірибесін ел игілігі мен қоғам дамуына арнауды азаматтық борышы деп біледі.
Бүрленнің бұл ісін жас ұрпаққа үлгі, қоғамға өнеге, елдің болашағына деген үміт деуге болады.
