Павлодар облысында ер адам отбасын өрттен құтқарып, артынша өзі ауруханада көз жұмды, деп хабарлайды облыстық Төтенше жағдайлар департаментіне сілтеме жасаған KAZ.NUR.KZ.
Ведомствоның баспасөз қызметінің хабарлауынша, 9 қазанда таңертең диспетчер орталығына жеке тұрғын үйде өрт шыққаны туралы қоңырау түскен.
Оқиға орнына өрт сөндірушілер дереу аттанған. Өрт сөндірушілер жеткенше шатырдың ағаш конструкциясы қызыл жалынға оранған.
Өрт шыққан үйден 1982 жылы туған ер адам жедел жәрдем қызметкерлеріне ес-түссіз күйде тапсырылған.
"Өрт сөндірушілер келгенге дейін ер адам жұбайы мен үш баласын терезеден шығарып, аман алып қалды. Барлығы жедел жәрдем қызметкерлеріне тапсырылды. Ер адам ауруханада көз жұмды", — деп мәлімдеді Павлодар облысының ТЖД өкілдері.
100 шаршы метр аумақты шарпыған өрт сөндірілді. Оның себебі анықталып жатыр.
Мәтіннен қате тапсаңыз, бізге жазыңыз
