Қысқартылған қызметкерлерге жұмысқа тұруға көмек көрсетіледі .
Өзбекстанда жасанды интеллектті енгізу арқылы 2 мыңнан астам шенеунік жұмыстан қысқартылады, деп хабарлайды inbusiness.kz сайты БАҚ-қа сілтеме жасап.
Өзбекстан президенті Шавкат Мирзиёев атқарушы билік органдарындағы басқарушылық штат бірліктерін қысқарту туралы жарлыққа қол қойды. Оптимизация жасанды интеллект енгізу себебінен іске асырылады. Бұл өзеріс түрлі ведомстволарға қатысты болмақ. 1 қарашадан бастап барлығы 2141 басқарушылық лауазым жойылады.
Ең көп қысқартуларға Салық комитеті (498 қызметкер) және Су шаруашылығы министрлігінің (224) қызметкерлері ілігеді. Бұдан басқа Ауыл шаруашылығы министрлігінде – 218, Әділет министрлігінде – 197, Экология, қоршаған ортаны қорғау және климаттың өзгеруі министрлігінде – 176, Еңбек және кедейлікті қысқарту министрлігінде 163 штат бірлігі жойылады.
Осылайша қысқартудан кейін мемлекеттік органдардағы басқарушы құрамның шекті саны 46 989 адам болады.
Еңбек және кедейлікті қысқарту министрлігі Кәсіподақтар федерациясы кеңесімен бірге жұмыссыз қалған қызметкерлерді еңбекпен қамтуға көмектеседі.
