Зымыран 2025 жылғы 8 қазанда АҚШ-тың Техас штатындағы ғарыш айлағынан ұшырылды .
Қазақстандық кәсіпкер Данна Қарағұсова америкалық Blue Origin компаниясының New Shepard суборбиталық кемесімен ғарышқа ұшып, Қазақстан тарихында ғарышқа көтерілген тұңғыш қазақ әйелі атанды, деп жазады inbusiness.kz сайты.
Бұл – Blue Origin компаниясының туристерге арналған 36-шы миссиясы.
Экипаж құрамында америкалық кәсіпкер Джефф Элгин, инженер және жасанды интеллект зерттеушісі Клинт Келли III, стартаптар негізін қалаушы Аарон Ньюман, украиналық кәсіпкер Виталий Островский және аты-жөнін құпия ұстаған тағы бір жолаушы болған.
Данна Қарағұсова осы алты қатысушының қатарында болып, ғарыштың шартты шекарасынан өтіп, салмақсыздық күйін сезінді. Сапар шамамен 10–12 минутқа созылған.
Кәсіпкер әлеуметтік желідегі парақшасында әсерімен бөлісті:
– Мұны сөзбен жеткізу қиын... Ғарыштан кейін адам өзгереді – жаның ашылып, жүрегіңді шексіз ризашылық пен тыныштық кернейді, – деп жазды ол.
Данна Қарағұсова бұған дейін ивент және дистрибуция саласында 25 жылдан астам уақыт еңбек еткен. Ол медиа және ивент-холдинг First Media Group компаниясының негізін қалаушылардың бірі.
