Бағанашылдағы балалар үйінің тәрбиеленушілері уақытша басқа орталыққа көшірілетін болды. Ғимаратта күрделі жөндеу жұмыстары жүргізілмек, деп өңірлік коммуникациялар қызметіне сілтеме жасаған KAZ.NUR.KZ хабарлайды.
Бағанашыл шағын ауданында орналасқан №2 Балаларды қолдау орталығының тәрбиеленушілері ғимараттағы жөндеу жұмыстарына байланысты уақытша №1 мектеп-интернатқа көшіріледі. Бұл туралы Алматы әкімінің орынбасары Азамат Қалдыбеков өңірлік коммуникациялар қызметінің алаңында өткен баспасөз конференциясында хабарлады.
Бүгінде "Бағанашыл" балалар үйінде 100 тәрбиеленуші тұрады, олардың 13-і – мектепке дейінгі жастағы бала, ал 87-сі – мектеп оқушысы.
"Қазіргі уақытта нысанды жөндеудің жобалық-сметалық құжаты дайын. Президенттің тапсырмасымен ғимарат толық жөндеуден өтеді. Жөндеу жұмыстарын жүргізу міндеттемесін "Integra Construction KZ" ЖШС өз мойнына алған. Компания жөндеуді балалар басқа мекемеге көшірілген соң бастайды", — деді Қалдыбеков.
Алматы білім басқармасының басшысы Сайран Сайфеденовтың айтуынша, балалар осы аптада көшіріледі.
"Бұл балалар үйі біздің күнделікті бақылауымызда. Қазіргі уақытта тәрбиеленушілерді №1 интернатқа көшіру туралы шешім қабылданды. Бұл мекемеде "Жанұя" кешенінің 90-нан астам тәрбиеленушісі тұрып келген. Екі апта бұрын мектеп-интернатта жөндеу жұмыстарын жүргізіп, 1 100 шаршы метр аумақ пен 18 бөлмені дайындадық. Осы аптаның соңында балаларды көшіруді жоспарлап отырмыз", — деді ол.
Мәтіннен қате тапсаңыз, бізге жазыңыз
