Олардың қатарында 10 адам көз жұмды.
Өкінішке қарай, Павлодар облысында жол-көлік оқиғасы азаймай тұр. Әсіресе, жаяу жүргіншілердің қатысуымен болатын қайғылы жайттар көп, деп хабарлайды inbusiness.kz тілшісі.
Жергілікті полиция департаменті ұсынған статистикалық мәліметтер көңілге қаяу түсіреді. Сандарды сөйлетер болсақ, жыл басынан бері жаяу жүргіншілердің қатысуымен 253 жол-көлік оқиғасы тіркелген. Кейбір апаттардың салдарынан бірден бірнеше адам зардап шеккен.
"Жол-көлік оқиғаларының салдарынан 10 адам қаза тауып, 280 тұрғын түрлі дене жарақатын алды. Бұл ретте жүргіншілердің өздері кінәлі болатын жайттардың барын да атап өту керек. Жиі кездесетін тәртіпсіздік – рұқсат етілмеген жерден жолды кесіп ету немесе бағдаршамның қызыл түсіне өтіп кету", — деп мәлімдейді департаменттің баспасөз қызметі.
Сол себепті тәртіп сақшылары жаяу жүргіншілерді де, көлік жүргізушілерін де жол ережелерін қатаң сақтауға шақырады.
