Депутаттар жаңа Құрылыс кодексіне осыған қатысты түзетулер берген .
Мәжіліс депутаты Асхат Аймағамбетов ең бірінші кезекте әлеуметтік инфрақұрылым салынуы керек екенін айтты, деп хабарлайды inbusiness.kz сайты.
"Бірінші, әрине, біз әлеуметтік инфрақұрылымды салып алуымыз керек. Мектеп, балабақша, аурухана. Кем дегенде ең бірінші кезекте осылар салынуы тиіс. Одан кейін тұрғын үй салынуы қажет. Біздің айтып отырғанымыз осы. Біздің берген түзетуіміз, біздің берген ұсынысымыз – дәл осы. Сондықтан біз бүгін осы мәселені көтеріп, осы сұрақ бойынша күресіп жатырмыз", – деді Асхат Аймағамбетов Мәжіліс кулуарында.
Депутаттың айтуынша, осы тұста екі нәрсені ескерген жөн.
"Біріншіден, құрылысын мемлекет жүргізетін кездер болады. Әлеуметтік инфрақұрылыммен, орта біліммен қамтамасыз ету мемлекеттің міндеті екені түсінікті. Көптеген мемлекетте пайда табатын девелопер бірінші кезекте әлеуметтік инфррақұрылымды салу міндетін өз мойнына алады. Сондықтан біз кодексте осы жағдайлар мен жауапкершілікті нақты бөлуіміз қажет. Біз осы туралы айтып отырмыз. Алдымен әлеуметтік инфрақұрылым. Яғни, адамдарға қажет мектептер, балабақшалар, емханалар, парктер, скверлер, мәдени инфрақұрылым", – деді мәжілісмен.
