Елімізде қолма-қол ақша жасайтын 81 топ әшкереленді, олардың айналым қаражаты – 24 млрд теңге. Бұл туралы үкімет отырысында Қаржылық мониторинг агенттігі төрағасының орынбасары Қайрат Бижанов айтты, деп хабарлайды KAZ.NUR.KZ.
Қайрат Бижанов үкімет отырысында мемлекет басшысының көлеңкелі экономиканы төмендету жөніндегі тапсырмаларын орындау бойынша жүргізіліп жатқан жұмыстар туралы баяндады.
Оның айтуынша, осы жылдың басынан бері қаражат айналымы 24 млрд теңгені құрайтын қолма-қол ақша жасайтын 81 топ әшкере болған.
Сондай-ақ қылмыстық кірістерді жылыстату схемаларына тартылған 130 крипто-биржаның қызметі тоқтатылған.
Көлеңкелі өндіріске қарсы күрес аясында темекі және алкоголь өнімдерін шығаратын 18 жасырын цех жойылған.
"Бұдан басқа, көлеңкелі айналымнан жалпы құны 12 млрд теңге болатын вейптер шығарылды, бұл заңсыз нарық ауқымын айтарлықтай қысқартуға мүмкіндік берді. 17 млрд теңгеге мұнай өнімдерін заңсыз әкету тоқтатылды. 62 жасырын казино жойылды", — дейді Қайрат Бижанов.
Айта кетелік, бүгінгі үкімет отырсында Қаржылық мониторинг агенттігі қаржы пирамидасына ұқсас онлайн-казиноларды жарнамалауға қатысты қылмыстық жауапкершілік енгізуді ұсынған еді.
Мәтіннен қате тапсаңыз, бізге жазыңыз
