2025 жылғы шайбалы хоккейден әлем чемпионаты АҚШ құрамасының тарихи жеңісімен аяқталды .
Финалда АҚШ Швейцария құрамасын 1:0 есебімен жеңіп, 1960 жылдан бері алғаш рет алтын медаль иеленді. Бұл араға тура 65 жыл салып келген чемпиондық атақ.
Матчтың негізгі уақыты тартысты өткенмен, есеп ашылмады – 0:0. Ал, овертаймда 1Buffalo Sabres" шабуылшысы Тэйдж Томпсонның швейцариялықтар қақпасына жасаған дәл соққысы Америка құрамасын жеңіске жеткізді. Бұл шайба тарихта алтын шайба болып қалмақ.
Финалдық ойын Швеция астанасы Стокгольмдегі "Avicii Arena" мұз айдынында өтті. Екі құрама да бар күшін салды, ал қақпашылар нағыз шеберліктерін көрсетті. АҚШ сапынан Джереми Сваймен 25 шайбаны қайтарса, Швейцария құрамасының қақпашысы Леонардо Дженони да бірнеше қауіпті сәттерде құрамасын құтқарып қалды.
АҚШ-тың бұл жеңісі тек спорттық қана емес, адамгершілік тұрғысынан да әсерлі болды. Жеңістен кейін америкалық хоккейшілер былтыр автокөлік апатынан қаза тапқан Джонни Годроға жеңістерін арнады.
Команда турнир бойы киім ауыстыру бөлмесіне оның жейдесін іліп қойды. Ал, жеңістен кейін кубокпен бірге Годроның жейдесін ұстап суретке түсті. Бұл жанкүйерлердің ғана емес, күллі хоккей әлемінің жүрегін тебіренткен көрініс болды.
Үшінші орын үшін өткен кездесуде Швеция құрамасы Данияны 6:2 есебімен жеңіп, қола жүлдеге ие болды.
Айта кетейік, әлем чемпионатында Қазақстан құрамасы да өнер көрсетіп, бірінші кездесуінде Норвегияны 2:1 есебімен жеңгенімен, қалған матчтарда сәтсіздікке ұшырады. Топтық кезеңнің қорытындысы бойынша соңғы орынға түсіп, келесі маусымда IA дивизионында өнер көрсететін болды.
2026 жылғы IA дивизионындағы әлем чемпионаты 2-8 мамыр аралығында Польшадағы Сосновец қаласында өтеді. Қазақстанның қарсыластары – Франция, Украина, Польша, Жапония және Литва. Франция мен Қазақстан топ-дивизионнан төмен түссе, Литва керісінше, IB дивизионынан IA дивизионына жоғары көтерілді.
Енді Қазақстан құрамасына қайта қалпына келіп, 2026 жылы элитаға оралу үшін барын салуға тура келеді.
