Қазақстан Ливерпульде өткен бокстан әлем чемпионатында тарихи жеңіске жетіп , жалпы командалық есепте бірінші орын алған еді. Чемпиондар мен олардың бапкерлеріне 100 мың АҚШ долларынан берілді, деп хабарлайды Skifnews.kz ақпарат порталы.
Туризм және спорт министрі Ербол Мырзабосынов спортшылармен, бапкерлермен және федерация өкілдерімен кездесу өткізіп, жеңімпаздарды құттықтады. Оларға 30-дан 100 мың АҚШ долларына (16 миллион теңге мен 55 миллион теңге аралығы) дейінгі сыйақылар табысталды. Ведомство өкілдерінің айтуынша, елде спортшыларды дайындауға әрі қарай да назар аударылады.
“Қазір біз бұл спорт түрін 2026–2030 жылдарға дамыту тұжырымдамасын әзірлеудеміз. Жақын арада құрамында заманауи залдары мен төрт рингі бар бокс кафедрасы ашылатын Ұлттық спорт университеті жұмысын бастайды”, – деп хабарлады ведомство басшысы Мырзабосынов.
Сондай-ақ Қазақстан бокс федерациясының президенті Шахмұрат Мүтәліпов "Құрметті спорт қызметкері" төсбелгісімен марапатталды. Ал вице-президент Дархан Қызайбаев, ҰОК бас хатшысы Әлімжан Ақаев, федерацияның атқарушы директоры Рауан Игенев, бас хатшы Мерей Ақшалов, ерлер құрамасының бас бапкері Қайрат Сәтжанов және әйелдер құрамасының бас бапкері Елдос Сайдалин "Құрмет" грамотасын алды.
Сонымен қатар медициналық штаб қызметкерлері – дәрігерлер Айгерім Жекеева мен Талғат Құқанов, физиолог Ерсултан Юлдашев және массажист Әлібек Әбіловке министрліктің алғыс хаттары табысталды.
Чемпиондар мен жүлдегерлер Санжар Ташкенбай, Махмұд Сабырхан, Торехан Сабырхан, Айбек Оралбай, Назым Қызайбай, Алуа Балқыбекова, Виктория Графеева, Аида Әбікеева, Наталья Богданова және Елдана Тәліпова да құрмет грамоталары мен сыйақыларға ие болды.
Еске сала кетейік, Англияда өткен жарыста Қазақстан құрамасы 7 алтын, 1 күміс және 2 қола медаль жеңіп алып, жалпыкомандалық есепте бірінші орынға ие болды. Чемпиондар қатарында Санжар Тәшкенбай, Махмұд пен Торехан Сабырхандар, Айбек Оралбай, Назым Қызайбай, Алуа Балқыбекова және Виктория Графеева бар.
