Футболдан UEFA Чемпиондар лигасының негізгі кезеңіндегі алғашқы ойында "Қайрат" Алматы клубы Португалияның "Спортинг" командасына 1:4 есебімен есе жіберді.
Бұл матчта жанкүйерлер "Қайраттың" жас қақпашысы Шерхан Қалмырзаға ерекше назар аударды. Себебі негізгі қақпашылар – Александр Заруцкий мен Темірлан Анарбеков жарақат алып, кездесуге қатыса алмады. 18 жас 3 ай 3 күнінде алаңға шыққан Шерхан UEFA Чемпиондар лигасы тарихындағы ең жас қақпашылардың қатарына енді.
Алғашқы кезеңде ол сенімді ойынымен көзге түсті. Әсіресе 21-минутта Мортен Юльманның пенальтиден тепкен добын қайтара білді. Бірнеше сәтте тағы да қақпасын аман сақтап қалды. Дегенмен 44-минутта "Спортинг" сапынан Франсиску Тринкан есеп ашты.
Екінші таймда алматылық футболшылар жиі қателікке бой алдырды. Небәрі 4 минут ішінде қарсылас 3 мәрте қақпаны дәл көздеді. 64-минутта Тринкан дубль жасаса, 66-минутта Алиссон Сантос, 68-минутта Жеовани Кенда мергендігімен танылды.
86-минутта "Қайрат" сапынан Эдмилсон 1 гол соғып, есеп айырмасын қысқартты. Алайда ойын 1:4 есебімен португалиялық команданың пайдасына аяқталды.
Енді алматылық клуб 30 қыркүйекте өз алаңында Испанияның "Реал Мадрид" командасына қарсы ойнайды. Сонымен қатар, "Қайрат" Чемпиондар лигасының негізгі кезеңінде "Интер" (Италия), "Арсенал" (Англия), "Брюгге" (Бельгия), "Олимпиакос" (Грекия), "Пафос" (Кипр) және "Копенгаген" (Дания) клубтарымен кездеседі.
Жалпы, қазақстандық команда турнир барысында 8 ойын өткізеді. Оның төртеуі Алматыда, ал қалған төртеуі сырт алаңда өтеді.
