АҚШ президенті Дональд Трамп Гарвард университетінен 3 млрд доллар көлеміндегі грантты алып, оны ел ішіндегі басқа оқу орындарына қайта бөлуді жоспарлап отырғанын мәлімдеді. Бұл туралы ол Truth Social әлеуметтік желісіндегі парақшасында жазды
Бұл туралы Caravan.kz медиа порталы baq.kz-ке сілтеме жасап хабарлайды.
Трамп Гарвардты «өте антисемиттік университет» деп атап, бұл қадамды әділетті шешім деп бағалады. Ақ үй басшысының айтуынша, Гарвард университеті шетелдік студенттерге құжаттарды заңсыз ұсынып келген және судьяларды іріктеу ісіне шектен тыс араласуға тырысқан. Осы себепті Трамп бұл оқу орнына берілетін мемлекеттік қолдауды басқа, кәсіби бағыттағы білім беру мекемелеріне бағыттауды орынды деп тапты.
Айта кетейік, 22 мамырда АҚШ Ұлттық қауіпсіздік департаментінің басшысы Кристи Ноэм Гарвард университетін халықаралық студенттерді қабылдау сертификатынан айырғанын жариялады. Осы шешімнің салдарынан қазіргі уақытта Гарвардта оқып жатқан шетелдік студенттер басқа оқу орындарына ауысуға мәжбүр болады.
Ал 23 мамырда Гарвард университеті бұл шешіммен келіспейтінін білдіріп, Трамп әкімшілігінің әрекетіне қарсы сотқа шағым түсірді. Университет академиялық еркіндік пен халықаралық білім алмасудың маңыздылығын алға тартып, аталған шаралардың саяси астары бар екенін жеткізді.
Саяси сарапшылар бұл жағдайды алдағы президенттік сайлау қарсаңындағы риторикамен және АҚШ-тағы жоғары білім беру мекемелері мен мемлекеттік билік арасындағы шиеленістің көрінісі ретінде бағалап отыр. Гарвардқа қатысты бұл тартыс академиялық ортаның тәуелсіздігіне қатысты ұлттық деңгейдегі пікірталасты қайта жандандырды.
