Енді қазақстандықтар зейнетақы жинағын стоматологиялық қызметке пайдалана алмайды.
Бұл – Денсаулық сақтау министрлігінің соңғы шешімі. Бұл туралы Денсаулық сақтау вице-министрі Ербол Оспанов айтты, деп хабарлайды inbusiness.kz сайты.
"Құзыретті органдармен жұмыстар жүріп жатыр. Нәтижесі бойынша шешім қабылданады. Сонымен қатар сол процеске қатысты субъектілер, объектілердің бәріне қатысты тергеу жүргізіледі. Біздің министрліктің ішінен де қосымша жүргізіледі. Қазір "Ашық НҚА" порталында министрліктің бұйрығы қаралып жатыр. Ол бойынша стоматологиялық қызметтер БЖЗҚ қаражатынан тоқтатылатын болады", – деді вице-министр Мәжіліс кулуарында.
БАҚ өкілдері бұл министрліктің соңғы шешімі бе деп нақтылады.
"Қазіргі таңда бұл соңғы шешім. Болашақта не болатынын ешқайсымыз айта алмаймыз. Бүгінге күнге ол соңғы шешім. Бірінші тергеу жұмыстарының бәрі бітсін, процесте, ұйымдастыру жұмыстарында қандай қандай ақаулар бар екенін білейік. Сосын барып ол сұрақ мүмкін қайта қаралатын шығар. Өздеріңіз білесіздер, анықталған қаражаттың сомасы 240 млрд-тан асады, анықталмағаны қанша. Ол тек қана үш-төрт өңірде болған нәрсе. Басқа өңірлерде не болып жатқанын тергеу көрсетеді", — деп атап өтті Ербол Оспанов.
Оның айтуынша, мәселенің толық мән-жайы анықталып, тергеу жұмыстары бітпей және тиісті азаматтарға қатысты шешім қабылданбайынша, ДСМ бұл сұраққа қайтып келмейді.
Айта кету керек, бұған дейін қазақстандықтар тісін зейнетақы ақшасына енді емдете алмайтынын жазған едік. ДСМ-нің тиісті бұйрық жобасы "Ашық НҚА" порталында жарияланды.
