Жәбірленушілер соттан қатаң жаза тағайындауды сұрады.
Алматыда "балаңызды шетелдік жоғары оқу орындарына түсіремін" деп 112 адамды алдаған оқу орталығының басшысына сот үкімі шықты.
Ер адам оқу орталығын ұйымдастырып, интернеттегі белсенді жарнама арқылы ата-аналарға балаларын шетелдік жоғары оқу орындарына "100 пайыз түсіремін" деп уәде еткен, деп жазады inbusiness.kz сайты Бостандық аудандық сотына сілтеме жасап.
Бұдан бөлек, ер адам Қазақстанда Foundation бағдарламасы бойынша оқытамын деп көпшілікті өзіне сендірген.
"Оқыту үшін ол жеңілдіктермен жедел түрде бөліп төлеу немесе несие рәсімдеу схемасын ұсынған. Алайда кейіннен шетелде оқу да, сертификаттар да берілмегені анықталды", – деді сот.
Алаяқтық жолмен сотталушы 112 азаматтан 168 млн теңге жинаған. Жәбірленушілер ол үшін барынша қатаң жаза тағайындауды сұраған. Ал айыпталушы кінәсін мойындамай, ақтауды талап еткен.
Бостандық ауданының №2 аудандық соты оны "Алаяқтық" бабы бойынша кінәлі деп танып, 7 жылға бас бостандығынан айырды. Алайда үкім Конституцияның 30 жылдығына орай жарияланған амнистияға байланысты бестен бір бөлігі қысқартылып, түпкілікті жаза мерзімі – 5 жыл 7 ай болып белгіленді.
Азаматтық талап-арыздар толық қанағаттандырылды: сотталғаннан жәбірленушілердің пайдасына 168 млн теңгеден астам қаржы өндіріп алынды.
