Вена қаласында өткен Атом энергиясы жөніндегі халықаралық агенттіктің (АЭХА) 69-шы Бас конференциясында еліміздің Атом энергиясы жөніндегі агенттігінің төрағасы Алмасадам Сәтқалиев сөз сөйлеп, Қазақстан бейбіт атомға, жаһандық қауіпсіздікке және тұрақты дамуға бейілділігін растады, деп жазады Egemen.kz.
Бас конференцияға ел делегациясын басқарып барған Алмасадам Майданұлы әуелі АЭХА бас директоры Рафаэль Мариано Гроссиге және оның командасына алғыс білдірді. Сөйтіп Конференция Бюросының жаңадан сайланған мүшелерін құттықтады.
Еліміз соңғы отыз жылдан астам уақыт бойы ядролық технологияларға жауапты көзқарас саясатын дәйекті түрде жүргізіп келеді. Әлемдегі көлемі жағынан төртінші ядролық арсеналдан өз еркімен бас тарту, Семей сынақ полигонын жабу мен Ядролық сынақтарға қарсы халықаралық күнді жариялау бастамасы елді ядролық қаруды таратпау ісінде сенім мен моральдық көшбасшылықтың символына айналдырды.
Былтырғы және биылғы жылдың маңызды оқиғасының бірі – атом электр стансасының құрылысына қатысты алғашқы ұлттық референдум болды. Оның қолдау табуы елдің энергетикалық дамуының жаңа кезеңін ашты.
«Атом энергетикасы – бұл тек сенімді энергия көзі ғана емес, сонымен қатар климаттың өзгеруіне қарсы күрестегі стратегиялық құрал. Қазақстан 2060 жылға қарай көміртекті бейтараптыққа қол жеткізуді мақсат етіп отыр. Осы өтпелі кезеңде атом энергетикасы шешуші рөл атқарады», деді делегация басшысы.
Саланы жүйелі дамыту мақсатында елде Атом энергиясы жөніндегі агенттігі құрылды. Ұлттық ядролық кластер қалыптасуда және атом саласын дамыту стратегиясы әзірленуде. Бұл құжат атом электр стансасын салуды, ядролық технологияларды медицина мен өнеркәсіпте дамытуды, радиоактивті қалдықтармен қауіпсіз жұмыс істеуді және кадр даярлауды қамтиды.
Қазақстан жаһандық ядролық қауіпсіздік жүйесінің маңызды қатысушысы болып қала береді. Біздің ел аумағында халықаралық энергетикалық тұрақтылықты нығайтатын АЭХА-ның төмен байытылған уран банкі жұмыс істейді.
Еліміздің Ұлттық ядролық орталығы басқарылатын термоядролық синтезді қоса алғанда, болашақ технологияларын әзірлеу мен ITER бағдарламасына қатысу арқылы халықаралық зерттеу алаңына айналып келеді. Ядролық медицинаны дамытуға ерекше көңіл бөлініп отыр. Қазақстан АЭХА-мен бірге радиофармацевтикалық препараттар өндірісін кеңейтіп, онкологиялық ауруларды диагностикалау мен емдеуді ел ішінде де, өңірде де қолжетімді етіп отыр. Өткен жылы Қазақстанның Ядролық физика институты алғаш рет АЭХА тапсырысы бойынша технеций-99m генераторын экспорттап, ядролық медицинаны дамытуға елеулі үлес қосты.
Қазақстан жаңа буын мамандарын даярлаудың заманауи жүйесін құрды. Ғылыми-білім беру әлеуетін нығайтты. Ұлттық бағдарламалардың жаһандық білім беру кеңістігіне интеграциялануына жағдай жасап жатыр.
«Қазақстан өз ядролық саясатын АЭХА-ның халықаралық стандарттарына негіздейді. Ашықтық пен халықаралық ынтымақтастықты дамытады. Бейбіт атом – бұл біздің ұлттық болашағымыздың бір бөлігі әрі адамзаттың ортақ болашағына қосқан үлесіміз – қауіпсіз, таза және ядролық қарудан азат әлем», деп қорытындылады ойын Алмасадам Майданұлы.
