Қазақстанда екі ислам банкі жұмыс істейді .
Мәжілісте банктер және банк қызметі туралы заң жобасының ілеспе түзетулері таныстырылды, деп хабарлайды inbusiness.kz сайты.
"Тек қана соңғы 5 жылда Банктер туралы Заңға 31 заңмен өзгерістер енгізілді. Оның ішінде, осы сайланым аясында ғана біз бірлесіп 800-ден астам түзету енгіздік, сол арқылы қарыз алушылардың құқықтары күшейтіліп, банктер мен ұялы байланыс операторларының жауапкершілігі артты. Олар қарыз алушы азаматтарымыздың құқықтарын қорғауға, қарыз жүктемесін азайтуға және несиелік алаяқтыққа қарсы күресті күшейтуге бағытталған. Осы орайда, қаралып отырған заң жобасында басқа да негізгі міндеттер шешімін табады", – деді Мәжіліс төрағасының орынбасары Дания Еспаева.
Оның айтуынша, нарыққа жаңа қатысушыларды тарту үшін жағдай жасалады, бұл бәсекелестікті күшейтіп, банк қызметтерін қолжетімді етеді және экономиканың нақты секторын қаржыландыруға екінші деңгейдегі банктердің қатысуын қамтамасыз етеді.
Депутат банк лицензияларының түрлерін саралау бәсекелестікті арттыруда маңызды фактор екенін атап өтті.
"Бүгінгі таңда реттеуші талаптар барлық банктер үшін бірыңғай. Бұл банк секторындағы бәсекелес ортаны әлсіретеді және кредит беру функцияларын, соның ішінде шағын бизнеске кредит беру функциясын орындай алатын шағын өңірлік банктер ашуды ынталандырмайды.
Заң жобасында талаптары аз базалық банк лицензиясын енгізу ұсынылады, бұл жаңа субъектілердің нарыққа кіруіне кедергілерді азайтуға мүмкіндік береді. Сондай-ақ, бәсекелестікті арттыру үшін исламдық қаржыландыруды дамыту қажет", – деді депутат.
Қазақстанда екі ислам банкі жұмыс істейді ("ADCB" Ислам Банкі" АҚ және "Заман банк" Ислам Банкі" АҚ).
Қаралып отырған заң жобасы шеңберінде біздің банктер үшін исламдық қаржыландыру қағидаттары бойынша қызметтер көрсету мүмкіндігі көзделеді, деді депутат.
Айта кету керек, бұған дейін https://www.inbusiness.kz/kz/news/elimizde-islamdyk-karzhylandyru-nege-ken-taralmaj-otyrgany-belgili-boldy елімізде исламдық қаржыландыру неге кең таралмай отырғаны белгілі болғанын жазғанбыз.
