Министрлік құжаттың бірнеше тармағына жасанды интеллектке қатысты талаптарды да қосуды жоспарлап отыр.
Ғылым және жоғары білім министрлігі студенттер үшін әлеуметтік орташа балл енгізуі мүмкін.
Қазақстандық студенттер, егер олар грант негізінде оқитын болса және академиялық қарызы бар болса, басқа жоғары оқу орнына ауыса алмайды. Тиісті бұйрық жобасын Ғылым және жоғары білім министрлігі "Ашық НҚА" порталында жариялады.
Жоба Үкімет қаулысына сәйкес әзірленген.
"31-тармаққа сәйкес, білім беру гранты негізінде оқитын студенттің академиялық қарызы болған жағдайда басқа жоғары оқу орнына ауысуына рұқсат берілмейді", – делінген құжатта.
Министрлік құжаттың бірнеше тармағына жасанды интеллектке қатысты талаптарды да қосуды жоспарлап отыр. Сонымен қатар, студенттің тек оқу жетістіктерін ғана емес, оның әлеуметтік, ғылыми, волонтёрлік, спорттық және мәдени іс-шараларға қатысуын да ескеретін объективті бағалау жүйесін енгізу ұсынылған. Осыған орай министрлік әлеуметтік орташа балл енгізуі мүмкін.
Оқи отырыңыз: Тоқаев: Шетелден мықты мамандарды ұлтына қарамай тарту – өте маңызды міндет
"Студенттердің академиялық жетістіктерінен бөлек, олардың әлеуметтік белсенділігі, зерттеу дағдылары, сондай-ақ аймақтық және республикалық деңгейдегі волонтёрлік қозғалыстарға қатысуы ескерілетін болады", – делінген құжатта.
Ашық талқылау 29 қыркүйекке дейін жалғасады.
