Англияның Ливерпуль қаласында өткен бокстан ересектер арасындағы әлем чемпионаты өз мәресіне жетті.
Бұл туралы Caravan.kz медиа порталы хабарлайды.
Алғаш рет World Boxing федерациясының ұйымдастыруымен өткен әлем чемпионатында Қазақстан құрамасы сәтті өнер көрсетті.
8 финалист, 7 чемпион
Финалға шыққан 8 боксшымыздың 7-і әлем чемпионы атанды.
Күндізгі сессияда бірінші болып өнер көрсеткен әйелдер құрамасының капитаны, 48 келі салмақ дәрежесінде өнер көрсеткен тәжірибелі боксшы Назым Қызайбай күміс жүлдегер атанды. Ол финалдық жекпе-жекте Қызайбай үндістандық Минакшиге есе жіберді. Осылайша бұрымды боксшымыз күміс медаль иеленіп, төрт дүркін әлем чемпионы болуға бір қадам жетпей қалды.
Айта кетейік, Назым Қызайбай финалға дейінгі кездесулерде Өзбекстан өкілі Сабина Бобокулованы, Украиналық Анна Охотаны, Венгриялық Лилла Селецкиді жеңген болатын.
Ал Санжар Тәшкенбай 50 келіге дейін салмақта топ жарып, Серік Сәпиевтен кейін бокстан екі дүркін әлем чемпионы атанған екінші боксшы болды. Қазақ боксының жанкүйерлері бұл күнді 18 жыл күтті.
Санжар финалда моңғолиялық Баттулга Алдархишигпен кездесті. Қазақ боксшысы қарсыласына еш мүмкіндік берген жоқ. Үш раундтың қорытындысы бойынша моңғолиялық боксшыны айқын басымдықпен жеңіп, Англия аренасында атой салды.
Үшінші болып шаршы алаңға шыққан Махмұд Сабырхан да Санжар Тәшкенбайдың жеңісті жолын жалғап екі дүркін әлем чемпионы атанды. 55 келіге дейін салмақта өнер көрсеткен отандасымыз финалда испаниялық Рафаэль Лосано Серраномен жолықты. Жекпе-жек барысында қазақ боксшысы қарсыласына еш мүмкіндік қалдырған жоқ. Айқын баысмдықпен жеңіске жетті.
Осылайша, Серік Сәпиевті қосанда Қазақстанда екі дүркін әлем чемпионы атанған үш боксшы болды.
Кешкі сессияда 51 келі салмақ дәрежесінде ел намысын қорғаған Алуа Балқыбекова да жеңіске жетіп, бір жылда екі рет әлем чемпионы атанды. Балқыбекова финалда түрік спортшысы Бусеназ Чакыроглумен кездесті. Үш раунд бойы айқын басымдық танытқан отандасымыз төрешілердің шешімімен чемпион атанды.
Ел қоржынына төртінші алтынды Аида Әбікеева салды. Финалда жекпе-жекте Әбікеева өзбек спортшысы Навбахор Хамидовамен күш сынасты. Шешуші раундта Аида кездесу барысында айқын басымдық танытып, төрешілердің шешімімен 3:0 есебімен жеңіске жетті. Осылайша Аида Әбікеева да екі дүркін әлем чемпионы атанды.
Қазақ боксының жаңа үміті Төрехан Сабырханның да жұлдызы жанды. 19 жасында әлем чемпионы болған ол финалда жапон боксшысы Севон Окадзавамен жұдырықтасты. Алғашқы раундта төрешілер 4:1 есебімен жапон спортшысына басымдық бергенімен отандасымыз екінші және үшінші раундта белсенділік танытып, жеңісті жұлып алды. Осылайша, ағайынды Сабырхандар бір күнде әлем чемпионы болып, тарихқа енді.
70 келіде ел намысын қорғаған Наталья Богданова да алтын медаль жеңіп алды. Ақтық сында Богданова аустралиялық Лекейша Перголитимен кездесті. Үш раунд бойы сенімді өнер көрсеткен отандасымыз төрешілердің бірауыздан шешімімен жеңіске жетті.
Ерлер құрамасының капитаны Айбек Оралбай (+90 келі) алтын медаль иегері атанды. Ол ақтық сында өзбекстандық Жахонгир Зокировпен қолғап түйістірді.
Бірінші және екінші раундта өзбек боксшысы басым түсті. Дегенмен Айбек Оралбай соңғы үшінші кезеңде қайсарлық танытып, жеңісті суырып алды.
Осылайша, Айбек Оралбай (90 келіден жоғары) әлем біріншілігін алтын медальмен аяқтады. Айтк кету керек, Айбек Оралбай алғаш рет Әлем чемпионы атанып отыр. Бұған дейін ол 2022 және 2024 жылдары Азия чемпиондығын жеңіп алған болатын.
Дәл осы жеңістің арқасында Қазақстан құрамасы жарысты 7 алтын, 1 күміс және 2 қола жүлдемен аяқтап, жалпыкомандалық есепте бірінші орын алды. Ал Өзбекстан құрамасы 6 алтын, 1 күміс және 2 қоламен екінші орынға жайғасты. Ал үздік үштікті 2 алтын, 1 күміс және 1 қоламен Үндістан түйіндеді.
