Мәскеуде «Интервидение» халықаралық музыкалық байқауында өнер көрсететін әншілердің реттік нөмірі белгілі болды.
Әміре сахналық есімімен танымал қазақстандық Ернар Садырбаев, 7-ші болып шығады. Ұйымдастырушылар жеребе тарту рәсімін 23 елдің қатысушылары арасында ойнатты. Нәтижесінде Мәскеудегі Live Арена сахнасына кубалық әнші бірінші болып шығатыны анықталды. Одан кейінгі кезек Қырғызстан, Қытай, Египет, АҚШ және Кения өнерпаздарына беріледі. Музыкалық байқауда ел намысын қорғайтын Әміре «Дарын» мемлекеттік жастар сыйлығының лауреаты атағына ие. Ол Темірбек Жүргенов атындағы Қазақ ұлттық өнер академиясының түлегі. Бірқатар халықаралық фестивальдер мен байқаулардың жеңімпазы. 2018 жылы Ернар Садырбаев Витебскіде өткен «Славян базары» фестивалінде топ жарды. Сондай-ақ ресейлік «Голос» жобасының қатысушысы.
