Татарстан астанасында XXI халықаралық кинофестиваль өтіп жатыр. Кинофорумның конкурстық бағдарламасында қазақстандық фильмдер де ұсынылды.
Қазанда «Алтын минбар» атты халықаралық кинофестиваль өтіп жатыр. Ауқымды іс-шара әлемнің түкпір-түкпірінен режиссёрлерді, актёрлерді және продюсерлерді жиырма бірінші рет жинады. Биыл байқаудың негізгі бағдарламасында 22 елден жолданған 54 туынды. Арасында қазақстандық фильмдер де бар.
Василь Шайхразиев, Татарстан Республикасы Премьер-министрінің орынбасары:
- Әрине, бұл әлемдік деңгейдегі маңызды іс-шара. Биыл 67 елден 845 жұмыс ұсынылды. Бұл пандемия кезеңімен салыстырғанда екі есе көп. Бүгінде Қазан қаласы халықаралық кинофестиваль орталығына айналып отыр.
Алмагүл Тлеуханова, кинопродюсер:
- Екі бауырлас халық арасындағы байланыс осындай шаралар арқылы нығая түседі. Біздің тамырымыз бен тіліміз ортақ, мәдениетіміз ұқсас. Қазақстан да, Татарстан да жалға алу жағынан шағын елдер саналады. Бірақ бірігіп әрекет етсек, көп жетістікке жетуге болады деп ойлаймын.
Кинофестиваль режиссёр Алдан Баймаханов пен сценарист Артур Веэбердің «Мика» мелодрамасымен ашылмақ. Сондай-ақ Фархат Шәріповтың «Эвакуация» драмасы, Алина Мустафинаның «Пряники для её отца» фильмі мен Кенжебек Шайқақовтың «Крик» атты картинасы көрсетіледі. Үздіктердің тізімі 9 қыркүйек белгілі болады.
Даната Мұхамедшина, көрермен:
- Бүгінгі таңда қазақ киносы қарқынды дамып келеді. Бұл жолы шарадан жақсы туынды күтеміз. Мысалы, «Эвакуация» фильмі. Кинокартина көптің көңілінен шығады деген үміттемін.
Көрермендерді «Кино и память» атты киножинақ күтіп тұр. Бұл топтама Отан қорғаушы жылына және Ұлы Жеңістің 80 жылдығына арналған. Айта кетейік, «Алтын минбар» — мұсылман киносының ең ірі фестивальдерінің бірі. Ал келесі жылы Қазан Ислам ынтымақтастығы ұйымы елдерінің мәдениет министрлері XIII конференциясында қабылданған шешімге сәйкес, ислам әлемінің мәдени астанасы атанбақ.
Авторлары: Әйгерім Ардаққызы, Дана Нұржан, Шахзод Гамиров
